Атырау вокзалы кеңейтілмек
Атырау облысы бойынша меншікті тілші
Жолаушы тасымалы қарқынды өсіп отырған бүгінгі таңда ертеректе салынған теміржол вокзалдары тарлық етуде. Соның бірі – Атырау вокзалы.
Вокзал – жолаушы халыққа қажетті барлық қызметті көрсететін орын. Билет алып, аялдап, тынығып, сапар алдында жолға қажетті нәрселерін түгендеп, тамақтанып, басқа да қызмет түрлерін пайдалатын жолаушылар үшін ең алдымен қолайлылық, қызметтердің қолжетімділігі керек. Елімізде жаңадан салынған вокзалдар кемде-кем, басым бөлігі бұрынғы вокзалдар. Атырау теміржол вокзалы 1972 жылы бой көтеріп, 500 орынға лайықтап салынған болатын. Ал бүгінде заман өзгеріп, ішкі-сыртқы миграцияның ұлғаюына байланысты жолаушылар тасқыны арта түсті. Жарты мың адамды жарылқауды көздеген вокзал бүгінгі күні тәулігіне мыңның үстінде адамға қызмет көрсетеді.
Атырау магистральдық желі бөлімшесі, вокзал шаруашылығы бөлімінің бастығы Айбек Қуанышевтің айтуынша, келесі жылы Атырау теміржол вокзалын қайта жаңғырту жұмысы қолға алынбақшы. Оны Атырау облыстық ЖКХ бөлімі жүзеге асыруды көздеп отыр. Жолаушыларға қолайсыздық тудырмау үшін бұрынғы вокзал жұмыс істей береді, соған қапталдастырып жаңадан ғимарат соғып, вокзалды ұзарту көзделіп отыр екен. Бұл әрине жолаушылар үшін жақсы жаңалық.