Атырауда жетпіс шақырым жол жаңартылды

Атырау магистральдық желісі бойынша биылғы жылы 69,642 шақырым теміржолды күрделі жөндеу жоспарланған. Бүгінде аймақта күрделі жөндеу жұмыстары толығымен аяқталып, жоспарланған жол телімдері түгел жаңарды.

Таратып айтсақ, «Интегра Констракшн» ЖШС мердігер компаниясы рзд 15 – станция Аққыстау – рзд Бақсай аралығында жоспарға сай 19,678 км, Жамансор станциясы – рзд 377 – Мақат станциясы аралығында – 22,7 км, Мұқыр станциясы – Жантерек станциясы – рзд Кенбай аралығында 22,2 км теміржолға күрделі жөндеу жүргізді.  

«Аталған телімдердегі бұрынғы тозған ағаш шпалдар түгел алынды. Әуелі жаңа мен ескінің түйіскен тұсы тазаланып, бұрандалары ағытылды. Тракторлар рельсі алынған жолды жыртып, сосын тегістеп, салмақпен нығыздап, жолды жаңа темірбетонды шпалдар төсеуге әзірледі. Жердің негіздемесі төселіп, шебін төсеу, жерді нығыздау, басқа да жұмыстар технологиялық талаптарға сай жасалды», – дейді Атырау жол дистанциясының бастығы Самат Боздақов.  

Құрылыс барысында ауыр жүктерді көтеріп-түсіруге КЖ-562 маркалы кран пайдаланылып, күрделі жөндеу жұмыстары кезінде ДУАМАТ, Унимат, ДГС, ПБР, ВПРС, т.б. машиналар да қолданылған. Жол сапасының жақсаруы алдағы уақытта жолаушылар пойызының жылдамдығын 60км/сағ-120км/ сағатқа, жүк пойызының жылдамдығын 50 км/сағаттан 100км/сағатқа көтеруге ықпал етеді. Ал Тальго жүрдек пойызы сағатына 140 шақырыммен зулайтын болады.  

Өткен он айда Атырау жол дистанциясы бойынша күшейтілген орташа жөндеу мен бағыттамалы бұрмаларды ауыстыру жұмыстары да жүргізілген. Ганюшкино, Туманный, Махамбет, Атырау, Мақат, Сағыз, Жамансор станцияларындағы аралық жолдар, барлығы 16,543 км теміржол орташа жөндеуден өтті. Биылға 33 жиынтық бағыттамалы бұрма салу жоспарланып, қазіргі уақытта 25 темірбетонды бағыттамалы бұрма Мақат, Теңдік, Аққыстау, Ганюшкино, Сағыз, Таскескен станциялары мен бірқатар разъездерге салынып, Ақжайық, Мақат, Ганюшкино, Аққыстау, Атырау станцияларында 19 ескі бұрмалар жаңасына ауыстырылған. Ал 11,965 км жол Р65 типті рельске ауыстырылған.