Талғат Алдыбергенов Алматы-1 вокзалын жаңғырту барысын тексерді
Қазақстан Республикасы Президентінің тапсырмасына сәйкес 2025 жылы «ҚТЖ» ҰК» АҚ бүкіл ел бойынша теміржол вокзалдарын қайта құру мен жаңғыртудың ауқымды бағдарламасын іске асыруға кірісті. Осы бағдарламаның негізгі нысандарының бірі Алматы – 1 теміржол вокзалы, деп хабарлайды Rail-news.kz.
Жолаушыларға қызмет көрсету сапасын арттыру және теміржол инфрақұрылымын жаңғырту жөніндегі тапсырмаларды орындау аясында бүгін «ҚТЖ» ҰК» АҚ Басқарма Төрағасы Талғат Алдыбергенов қазіргі уақытта жөндеу және жаңғырту жұмыстары жүргізіліп жатқан Алматы – 1 теміржол вокзалына барды.
Сапар барысында Басқарма Төрағасы объектінің ағымдағы жай-күйімен танысып, орындалып жатқан жұмыстардың барысын және вокзал инфрақұрылымының негізгі элементтерінің дайындық дәрежесін бағалады.
«ҚТЖ» ҰК» АҚ – «Магистральдық желі дирекциясы» филиалының баспасөз қызметінің мәліметінше, тексеру қорытындысы бойынша Талғат Алдыбергенов жөндеу және құрылыс іс-шараларын жүргізуге жауапты мердігер ұйымдар тарапынан жұмыстардың нашар ұйымдастырылғанын атап өтті. Жұмыстың ағымдағы қарқыны мен сапасы белгіленген талаптар мен мерзімдерге сәйкес келмейтіні алға тартылды.
«Анықталған кемшіліктерге байланысты Басқарма Төрағасы Алматы – 1 вокзалындағы жұмысты күшейтуді және жандандыруды, мердігерлердің қосымша ресурстарын жұмылдыруды, мерзімдер мен сапа стандарттарының сақталуын қатаң бақылауды қамтамасыз етуді, сондай-ақ жобаны іске асыруды ерекше бақылауға алуды тапсырды», - делінген хабарламада.
Құрылыс алаңындағы қауіпсіздік, мердігерлік ұйымдардың іс-қимылдарын үйлестіру және жұмыс жүргізу кезеңінде жолаушылар үшін қолайсыздықты азайту мәселелеріне ерекше назар аударылды.
Алматы – 1 вокзалын реконструкциялау жолаушылар аймақтарын жаңартуды, инженерлік жүйелерді жаңғыртуды, ғимараттың энергия тиімділігін арттыруды, заманауи навигациялық жабдықтарды енгізуді және тұрғындардың мобильділігі төмен топтары үшін қолжетімділік жағдайларын жақсартуды көздейді.
Жобаны іске асыру сервис деңгейін арттыруға, жолаушылар үшін қолайлы және қауіпсіз орта құруға, сондай-ақ қаланың және тұтастай елдің көлік инфрақұрылымын дамытуға бағытталған.