Қызылжар – Сексеуіл учаскесін жаңғырту қарқыны кестеден озып тұр
Қызылжар – Сексеуіл теміржол учаскесінде (жалпы ұзындығы 712 км) Мыңбала және Қоскөл станциялары арасындағы 4 аралықта (157 км) кезекті микропроцессорлық автоблокировка жүйесін іске қосу сәтті аяқталды, деп хабарлайды Rail-news.kz.
Қазіргі уақытта жаңартылған учаскелердің жалпы ұзындығы 505 км-ге жетті.
2026 жылдың наурыз айы соңына дейін Қызылжар – Сексеуіл теміржол учаскесінде автоблокировка салу жобасы бойынша тағы 128 км жол цифрлық жүйемен жабдықталады.
Микропроцессорлық технологияларды енгізу – Компанияның инфрақұрылымын жаңғырту бағдарламасының басым бағыты. Цифрлық автоблок жүйелеріне көшу тасымалдау қауіпсіздігін бірнеше есе арттыру ғана емес, сонымен қатар осы учаскедегі пойыздарды өткізу қабілеті мен қозғалыс қарқындылығын едәуір арттыруға мүмкіндік береді.