Келіссөз жүргізу де – өнер
«Қазақстан теміржолшысы» газетінің тілшісі
Жас теміржолшылар сонымен қатар «Көп алдында сөйлеу және келіссөздер жүргізу» атты тренингке қатысты. Бұл тренингте жастар келіссөздерді қалай жүргізуді, уағдаластыққа қол жеткізу жолдарын, сол бағыттағы әркімнің өз стилін анықтауды үйренді.
Маманның айтуынша, келіссөз жүргізуде оң нәтижеге қол жеткізуде көп нәрсе, яғни жетістіктің 70 пайызы дайындықты қалай жүргізгеніңе байланысты болады.
– Көбі келіссөз жүргізуде мәселені сол сәтте барып шешіп тастаймын деп ойлайды. Алайда оған үлкен дайындық керек. Осы тұрғыда біз тренингте практикалық жаттығулар көрсетіп, әр қатысушының келіссөзді қалай жүргізетінін бақылаймыз және оған баға береміз, қай тұсын жөндеу керектігін айтып, кеңес ұсынамыз. Ұзақмерзімді серіктестікті сақтап қалудың жолдарын көрсетеміз. Менің тренингіме қатысушылар өмірде, жұмыста, тіпті отбасында жақсы қарым-қатынас орнатуда нақты бір нәтижелерге қол жеткізу үшін қандай машықтар қажет екенін түсінеді. ҚТЖ жастарымен бірнеше жылдан бері осы форум аясында жұмыс жүргізіп келемін. Бұл жастар өте белсенді, көңілді, тез қабылдағыш, көздері жанып тұрады. Кем дегенде 50 адам қатысады, – дейді келіссөздер бойынша жаттықтырушы Светлана Каплина.
Тренингте келіссөздер барысында көңіл-күйдің өзгеруін де бақылау және оны басқара білу, ашуға бой алдырмау, барынша сабыр сақтау маңыздылығы айтылды.
– Бұл тренингте айтылған дүниелер менің жұмысым үшін маңызы өте зор болды. Себебі үлкен станция болғандықтан жан-жақты келіссөздер жүргізу қажеттілігі көп туындайды. Мұнда біз келіссөздер жүргізу негіздерін үйреніп, қызметкерлермен, басқа да бизнес өкілдерімен сауатты қарым-қатынас құра білу жолдарын түсіндік. Қызмет барысындағы түрлі жағдайларды шешу жолдары да сөз болды. Сонымен қатар көпшілік алдында сөйлей білу, адамдарға өзіңді тыңдата білу жолдарын да тренер практика жүзінде көрсетіп берді. Өзіңді қалай ұстап, сөзді неден бастап, немен аяқтау керектігін түсіндірді. Кинофильмдерден үзінділер көрсете отырып, әр ситуацияны талдадық. Қысқаша айтқанда, келіссөздердің 5 түріне шолу жасалды. Олар – іскерлік, саяси, тұлғааралық, медиативті және дағдарысты келіссөздер, – дейді Павлодар станциясы бастығының орынбасары Нұрсұлтан Екпентаев.
