ҚТЖ Қарағанды облысында дизель отынының ұрланғанын анықтады
Қарағанды локомотив пайдалану депосының басшылығы мен Қарағанды-Сұрыптау станциясы желілік полиция бөлімінің қызметкерлері жүргізген бірлескен жедел-іздестіру іс-шараларының нәтижесінде ірі мөлшерде дизель отыны ұрланғаны анықталды, деп хабарлайды Rail-news.kz.
Заңға қайшы әрекеттерді Углерудная –Дубовка аралығындағы Тегісжол станциясы учаскесінде жұмыс істеген локомотив бригадалары ( тепловоз машинистері және машинист көмекшілері) жасаған. Келтірілген залал сомасы 7,7 миллион теңгеден асты.
Тергеу аясында "ҚТЖ-Жүк тасымалы" ЖШС жәбірленуші тарап деп танылып, күдіктілерге азаматтық талап қойды.
2025 жылғы 17 наурызда болған сот талқылауының нәтижелері бойынша күдіктілерді сот қылмыстық құқық бұзушылық жасағаны үшін кінәлі деп таныды. Олардың әрқайсысына бүкіл кезеңге пробациялық бақылау белгілей отырып, 2 жыл мерзімге бас бостандығын шектеу түріндегі жаза тағайындалды.
Кәсіпорынға келтірілген залал толығымен өтелді. Үкім заңды күшіне енді.