ҚТЖ: Қаржылық тұрақтылық сақталуда
«Қазақстан теміржолшысы» газетінің тілшісі
Кеше «Самұрық-Қазына» АҚ қызметінің мәселелері талқыланған баспасөз-брифингі өтіп, оған басқарма төрағасы Нұрлан Жақыпов пен басқарушы директорлары қатысты. Жиында Қор қызметінің негізгі мақсаттары, іске асырылып жатқан ірі жобалары, отандық тауар өндірушілерге қолдау көрсетуі сынды тағысын тағы мәселелер сөз болды.
Қордың басқарма төрағасы өз сөзінде қор қызметі бірінші кезекте активтердің құнын арттыруға, яғни ірі инвестициялық жобаларды жүзеге асыруға және шетелдік инвестицияларды тартуға бағытталып отырғанын атап өтті. Оның айтуынша, Қордың жалпы инвестициялық портфелі 53 трлн теңге сомасындағы 130 жобаны құрайды, бес жыл ішінде 27 млрд АҚШ долларын құрайтын шетелдік инвестиция тартылған. Қордың қолдауымен 2023 жылдан бері 25 ірі жоба іске асырылса, олардың қатарында ҚТЖ компаниясына тиесілі Қытайдың Сиань қаласында салынған жүк терминалы, Ақтау порты базасындағы контейнерлік хабтың бірінші кезегі, сондай-ақ, күні кеше ғана берілген Алматыдағы Zhetysu логистикалық кешені жобалары бар.
«Бұл жобаларды іске асыру арқылы жүктерді жеткізу мерзімін қысқартуға және қазақстандық маршруттардың тар тымдылығын арттыруға, сондай-ақ, елдің транзиттік әлеуетін жақсартуға мүмкіндік туып отыр. Осылайша, Қазақстанның Орталық Азиядағы сенімді транзиттік хаб ретіндегі рөлі күшейе түсті» деп атап өтті Нұрлан Жақыпов.
Сонымен қатар жиында биыл аяқталуы жоспарланып отырған «Достық-Мойынты теміржол желісіндегі екінші жол құрылысы» жобасы бұл учаскенің өткізу қабілетін 5 есеге немесе тәулігіне 12-ден 60 жұп пойызға дейін арттыратыны, ал жыл соңында қолданысқа берілгелі отырған Алматыдағы айналма теміржол желісі еліміздің транзиттік әлеуетін ұлғайтумен қатар Алматы теміржол торабының жүктемесін 40%-ға жеңілдететіні сөз болды. Ал 2026 жыл еншісіне қалып отырған 152 км «Дарбаза – Мақтаарал» және 366 км құрайтын «Мойынты – Қызылжар» теміржол желілерінің құрылысы да транзиттік жүк тасымалында ерекше сипатқа ие болатыны айтылды.
Қорға қарасты компаниялар тобы бойынша іске асырылып жатқан жобалар, басқа да маңызды мәселелер талқыланған брифингте журналистер сауалдарына да кезек берілді. Қазақстан темір жолына қатысты: «ҚТЖ-ның табысынан қарызы басым деседі, егер бұл рас болса, қарыз мөлшері қандай және оған не себеп?» деген журналист сауалына, «Самұрық-Қазына» АҚ Экономика және қаржы жөніндегі басқарушы директоры әрі ҚТЖ Директорлар кеңесінің төрағасы Айдар Рысқұлов жауап беріп: «Соңғы төрт жылда ҚТЖ көрсеткіштері айтарлықтай жақсарды. 2020 жылдан бастап қаржылық көрсеткіштер өсімі артты. Мысалы, 2024 жылдың жұмыс қорытындысын 2023 жылмен салыстырсақ, кіріс 84 %-ға өсіп, таза табыс 9 есе артқан. Компания несиелерін уақытында төлеп отыр. Қазіргі таңда ҚТЖ-ның борышы 2,7 трлн теңге, бұл қаражат жылжымалы құрамды жаңарту және инфрақұрылым салуға жұмсалған. Бүгінде ҚТЖ-ның қаржылық тұрақтылығын халықаралық рейтингтер жоғары бағамен растап отыр», – деді.