ҚТЖ Балаларды қорғау күні қарсаңында қызметкерлерінің 100 дарынды балаларын қолдады (ФОТО)
«Қазақстан темір жолы» ҰК» АҚ әлеуметтік саясаты аясында және Басқарма Төрағасы Т. Алдыбергеновтың бастамасымен Халықаралық балаларды қорғау күні қарсаңында ҚТЖ компаниялар тобы қызметкерлерінің балаларын қолдауға бағытталған бірқатар іс-шаралар іске асырылды, деп хабарлайды Rail-news.kz.
Атап айтқанда, шалғай станцияларда тұратын Компания қызметкерлерінің көп балалы отбасыларынан шыққан 100 дарынды бала алғыс хаттармен және бағалы сыйлықтармен марапатталды. Сыйлықтарға велосипедтер, LEGO конструкторлары және балалардың интеллектуалды және шығармашылық дамуына, сондай-ақ белсенді демалысына әсер ететін басқа да дамытушы жиынтықтар кірді.
Ағымдағы жылдың 23 мамырынан бастап бүкіл еліміз бойынша желілік басшылар Компания басшылығының атынан өндірістік персонал қызметкерлері балаларының оқудағы, спорттағы, шығармашылықтағы және қоғамдық қызметтегі ерекше жетістіктері үшін құттықтауда.
Сонымен қатар, Компанияда өскелең ұрпақтың шығармашылық әлеуетін дамытуға, теміржол саласы мамандықтарын дәріптеуге және ұрпақтар сабақтастығын нығайтуға бағытталған «Теміржол балалардың көзімен» тақырыбында балалар бейне және шығарма жазу конкурстары ұйымдастырылды.
Өткізіліп жатқан іс-шаралар дарынды балаларды қолдауға, оларды оқу мен дамуға деген ынталарын арттыруға, сондай-ақ корпоративтік құндылықтарды, әлеуметтік жауапкершілікті нығайтуға және ҚТЖ компаниялар тобы қызметкерлерінің отбасыларын қолдауға бағытталған.
