Астанада күрделі жөндеуден кейін локомотивтердің техникалық қызмет көрсету пункті ашылды
Астана локомотив пайдалану депосында күрделі жөндеуден өткен локомотивтерге техникалық қызмет көрсету пунктінің (ЛТҚҚП) салтанатты ашылуы өтті, деп хабарлайды Rail-news.kz.
1975 жылы салынған бұл ғимарат толық жаңартылды. Нысанның жалпы аумағы – 2 888 шаршы метр. Жүргізілген жұмыстар еңбек жағдайын айтарлықтай жақсартып, өндірістік қауіпсіздік деңгейін және жылжымалы құрамға қызмет көрсету тиімділігін арттырды.
Жаңарған ғимаратта депо кезекшілері, қызметкерлерге арналған душ бөлмелері, нұсқаушы кабинеттер мен жылдамдық өлшегіш ленталарды талдайтын инженерлердің кеңселері орналасқан.
Бұл пунктте ай сайын шамамен 1 100 локомотивке техникалық қызмет көрсетіледі. Мұнда әкімшілік-басқару персоналын, пайдалану бөлімдерінің қызметкерлерін және слесарьларды қосқанда 110 адам еңбек етеді.
Күрделі жөндеу барысында инженерлік жүйелер жаңартылып, технологиялық жабдықтар модернизацияланды және қызметкерлерге қолайлы еңбек жағдайы жасалды. Нәтижесінде локомотивтерге қызмет көрсету сапасы мен тасымалдау процесінің сенімділігі артты.