Апаттың алдын алғандар
"Қазақстан теміржолшысы" газетінің Жамбыл облысындағы меншікті тілшісі
«ҚТЖ – Жүк тасымалы» ЖШС Жамбыл филиалының Жамбыл локомотив пайдалану депосының электровоз машинисі Игорь Зенков пен көмекші машинист Иса Мурадов өткелде жол-көлік апатының алдын алды.
Оқиға бірер күн бұрын Тараз-Шу учаскесі аралығында орын алды. Таңғы 06.26-да Тараз – Шу бағытында сағатына 55 шақырым жылдамдықпен келе жатқан локомотив Chevrolet cobalt көлігіне соқтықпас үшін шұғыл тежеуді қолданады. Пойыздың келе жатқанын көріп, дабыл белгісі қосылып тұрғанына қарамастан көлік жүргізушісі қауіпсіздік ережесін өрескел бұзып, өткелден өтіп кетуге тырысқан. Тіркелген факт Көліктегі полиция департаментінің Тараз станциясындағы желілік бөліміне жолданды.
– Орын алған жағдайға байланысты пойыз 22 минутқа кешікті. Локомотив бригадасы қырағылығының арқасында апаттың алдын алуға мүмкіндік туды. Машинист пен көмекшісі жылдамдықты, арақашықты дұрыс есептеп, тежеуді дер кезінде қолданған. Ауыр салмақтағы пойыздың инерциямен қай тұста тоқтайтынын дұрыс болжамаса, соқтығысудың салдары қандай болары белгісіз, – дейді Жамбыл локомотив пайдалану депосы бастығының пайдалану жөніндегі орынбасары Мәди Қонысбаев.
Машинист Игорь Зенков пен көмекшісі Иса Мурадов – екеуі де Тараз теміржол көлігі және коммуникация колледжінің 2009 жылғы түлектері. Игорь Зенков Жамбыл локомотив пайдалану депосында 2010 жылдан бері еңбек етеді. Машинист көмекшісі Иса Магамедович 2017 жылы қазан айында электровоз машинисінің көмекшісі болып орналасып, содан бері тынымсыз тер төгіп келеді.