Көлік нысандарында есірткі қылмысына қатысы бар 7 шетелдік анықталды
Көліктегі полиция департаменті «Қарасора – 2026» жедел-профилактикалық іс-шарасы аясында үш айдың ішінде есірткі құралдарының заңсыз айналымына қатысты 95 құқық бұзушылықты анықтағандарын мәлімдеді, деп хабарлайды Rail-news.kz.
Көліктегі ПД Есірткі қылмыстарына қарсы іс-қимыл басқармасының бастығы Фараби Елубаевтың мәліметінше, анықталған деректердің арасында есірткі өткізудің 18 фактісі, аса ірі көлемде сақтаудың 3 дерегі және 6 контрабанда фактісі бар.
Жедел-профилактикалық іс-шара барысында заңсыз айналымнан 240 келіден астам түрлі есірткі құралы тәркіленді.
Сонымен қатар еліміздің әуежайлары мен теміржол вокзалдарында есірткінің заңсыз айналымына қатысы бар 63 адам жауапкершілікке тартылды. Олардың жетеуі шетел азаматы. Анықталған фактілер бойынша сотқа дейінгі тергеп-тексеру жүргізілді.
Фараби Елубаев жүргізілген жұмыстың нәтижесі ретінде Жамбыл облысының тұрғынын ұстау дерегін атап өтті. Күдіктіден Қазақстан аумағында әрі қарай өткізуге дайындалған 37 келіден астам марихуана тәркіленген.
Көлік полицейлері әуежайларда, теміржол вокзалдарында, жолаушылар пойыздарында және басқа да көлік инфрақұрылымы нысандарында есірткінің заңсыз айналымына қарсы күрес пен қауіпсіздікті қамтамасыз ету шараларын жалғастырып жатыр.