Маңдайын – күн, самайын жел сүйген жан
Түркістан облысы бойынша меншікті тілші
Гүлнәр Жанқожақызы – Арыс жол дистанциясының 19-шы айналымында 1984 жылдан бері жол жөндеуші болып еңбек етіп келеді. Сол кездері Гүлнәр апайдың қызмет орны Соларский жол дистанциясы деп аталған.
Яғни Кеңес үкіметі кезінде Өзбекстанның Ташкент өңіріндегі теміржол тармағының санатында болған бұл телім 2003 жылдары ғана Қазақстан меншігіне өткен. Мінекей, соған дейінгі де, кейінгі де кезеңдерде мекеме атауы сан құбылып, бірнеше рет ауысқанымен, Гүлнәр апайдың еңбек жолы да, лауазымы да еш өзгермеген...
«Мен бойжеткен шағымда әкем «техник боласың» деді. Әкей айтты, біз көндік. Содан бері сол кісінің сүрлеу-соқпағымен жүріп келе жатқаныма табаны күректей 40 жыл болды», – дейді кейіпкеріміз.
Негізінен көп жағдайда бұл қызмет ер азаматтарға тән ауыр жұмыс екені белгілі. Алайда, кейіпкеріміз жұмысқа араласа бастаған кезде, оның қасында бір жеңгесі мен апайы болған. Бертін келе, оның бірі бақиға аттанып, екіншісі зейнетке шыққан. Оған қоса, қайбір жылы қыз-келіншектерді физиологиялық тұрғыда ауыртпалық жүктейтін мұндай жұмысқа тартпау туралы Ұлттық компания тарапынан арнайы ереже шыққан. Бірақ салаға жетекшілік ететін жауапты мамандар Гүлнәр Жанқожақызының отбасылық жағдайы мен ұзақ жылдық мол тәжірибесін ескеріп зерделей келе, оның осы қызметтен құрметті демалысқа шыққанын жөн көріпті. Гүлнәр әпкеміз қазір жолшылар қатарында жұмыс істеп жүрген бір ғана әйел. Жақын күндері көп жылғы еңбегінің зейнетін көруге құрметті демалысқа шықпақ.
Өмірінің осыншама уақытын шойын жол шаруашылығына арнаған ана бүгінде қос перзентінен оншақты немере сүйіп отырған ақ жаулықты әже. Ер азаматтармен қатар жүріп маңдайын күнге, самайын желге сүйдірген ол: «Мен көрген қара жұмыстың қиындығын балаларым көрмесін» деп екі қызының медициналық білім алуына жағдай жасайды. Енді міне, сол көңіл қалауы, асқақ арманы орындалып, қыздары Наргиза мен Гузаль ақ халатты абзал жандардың қатарында ұлт саулығының сақталуына өз үлестерін қосып келеді.
Гүлнәр апайдың ағасы Ержігіт Қалтайұлы осы күндері теміржолда өзімен қатар несібесін теріп жүрсе, әкесі Жанқожа осы саладан зейнетке шыққан ақсақал. Ал атасы Қабыл болса, Жылға маңындағы теміржолдың дамуына жылдар бойы тер төгіп, өмірден өткен жан екен.