Астанада тоғысқан тағдырлар

Ару Астана қаншама жастың үкілі үмітін үрлеп жағып, арман-тілегін орындады. Түбекте туып-өсіп, бүгінде ерке Есілдің жағасындағы ертегідей қаланың тұрғыны атанған Қайраттай қанша жастың шаңырағын көтеріп, уығын қадасты...

Маңғыстау магистральдық желі бөлімшесінде еңбек етіп жүрген  Қайрат Абдашов компания шеңберінде өндірістік қауіпсіздік бағдарламасы бойынша мобильдік қосымша пайда болып, кез келген адам көрген қателіктер мен бұзушылықтарды тіркеу мүмкіндігі пайда болғанда алғашқылар қатарында бағдарламаға 71 кемшілікті енгізген еді. Осы еңбегінің нәтижесінде «Жыл үздігі» атанып, шетелге саяхаттау мүмкіндігін жеңіп алған болатын. Темір жолда қозғалыс қауіпсіздігінің сақтауына осылай өз үлесін қосқан қырағы теміржолшы  көп ұзамай Астанаға жұмысқа шақырту алып, елордалық атанды.  

Түбекте жүргенде де өз міндетімен қатар қоғамдық жұмыстарға да белсене қатысатын ол маңғыстаулық теміржолшылардан құралған «Маңғыстау.кз» жайдарманшылар тобының белді мүшесі, спорттық, басқа да сайыстардың үздік қатысушысы болды. Астанаға барып та түрлі іс-шараның ортасынан табыла білген жігіт сондай кездесулердің бірінде жан жарын жолықтырды.  

– 2022 жылы Магистральдық желі дирекциясының шақыртуымен Еңбек қауіпсіздігі және экология департаментіне менеджер болып ауыстым. Тамыз айында мен Ақтау қаласынан, ал Әйгерім болса Семей қаласынан Астанаға ауысып, сол жылы Әлеуметтік басқару департаменті жариялаған «100 жас есім» жобасында кездестік.  Тағдырдың тосынсыйы осы болар, жоба аясында таныстығымыз көп ұзамай махабатқа ұласып, өткен жылдың жазында отбасын құрдық. Маңғыстаулық және семейлік теміржолшылар әулетін құда атандырдық, – дейді Қайрат Абдашов.  

Қайрат пен Әйгерім ақылдаса келе бақытты күндерінің естен кетпес датасын осы саламен байланыстыруды жоспарлап, өткен жылы теміржолшылар күнінде шаңырақ көтеріп, той өткізген. Жақында Сұлтан есімді ұлдары дүниеге келді. Қос теміржолшының шағырағында Астана күні қарсаңында іңгәлаған сәби үні естіліп,  елорда халқы бір қазаққа көбейді.

Бала Сұлтанның өз жұрты да, нағашы жұрты да теміржолшылар. Қайрат түбекке белгілі Абдашовтар династиясынан болса, Әйгерім Шымырбаева да семейлік сала қызметкерлері отбасынан екен. 100 жас есім» жобасынан бөлек ол «Жас темір» жас мамандарды даярлау жобасының жеңімпазы. «ҚТЖ» ҰК» АҚ филиалы – Интеграция және жоспарлау дирекциясында жүк тасымалы маркетингі департаментінің менеджері бүгінде бала күтіміне байланысты демалыста.  

Ал астаналық жас отбасының отағасы Қайрат Абдашов «ҚТЖ» ҰК» АҚ  Еңбек қауіпсіздігі және қоршаған ортаны қорғау инспекциясының менеджері. Компания шеңберінде өтетін түрлі жобаның қатысушысы.