Теміржолшының анасына арналған алғыс
"Қазақстан теміржолшысы" газетінің Жамбыл облысындағы меншікті тілшісі
Сағаткүл апаның қолында жаңа ғана ұлының батылдығы үшін берілген Алғыс хат! Сыртынан аялай сипап, қасында қолтығынан демеп келе жатқан Ермұратына қарап қояды. Құшағы гүлге толып, өзіне көрсетілген осынша құрмет пен қошеметке көңілі тоқ. Қазақы шапан кигізіп, иығына орамал жауып, өзіне көңіл бөлгенге шаттанған анасының жүзін көріп, ұлы да разы.
Теміржолшылардың кәсіби мерекесіне арналған салтанатты жиында көрсетілген құрмет пен қошемет, «Қазақстан темір жолы» ҰК» АҚ-ның Басқарма төрағасы Талғат Алдыбергеновтің атынан тапсырылған Алғыс хат теміржолшының анасына арналған еді. Осы бір көрініс көптің көңіліне ерекше әсер сыйлады. Қаншама жүрекке жылуын дарытып, іштей тебірентті.
«Қазақстан темір жолы» ҰК» АҚ-ның Басқарма төрағасы Талғат Алдыбергеновтен келген Алғыс хат былай деп басталады:
«Құрметті, Сағаткүл Рақышқызы!
Ананың жүрегінен тараған мейірім мен тәрбие адам тағдырын қалыптастырады дейді. Осындай жүрек тәрбиесін көрген жанашыр да батыл азамат – сіздің ұлыңыз Ермұрат мен үшін нағыз ерлік пен адамгершіліктің бейнесіне айналды. Ол тек Жамбыл жол дистанциясы бастығының орынбасары ретінде ғана емес, сын сағатта тайсалмай әрекет ететін, қауіптің алдын алып, өзгеге араша түсе алатын нағыз теміржолшы, нағыз азамат ретінде танылды»...
Бұл оқиға Тараз қаласындағы «Барысхан» тұрғын алабында болған. Көшеде келе жатқан қаршадай қыз қабаған 5 иттің қоршауында қалады. Қараусыз жүрген иттердің талауына түсіп, шырқыраған қыздың дауысын естіп қалған Ермұрат Жолмаханұлы бірден көмекке ұмтылады.
Топ иттің талауынан құтқарған теміржолшы туралы әлеуметтік желіде жазбалар көп таралды.
«Ермұраттың бойындағы парасат пен ерлік – сіздің үлгілі тәрбиеңіз бен отбасыңыздағы рухани құндылықтардың жемісі деп білемін. Сізге мықты денсаулық, ұзақ ғұмыр, амандық тілеймін», - деп жазылған теміржолшының анасына арналған Алғыс хатта.
Тараздық Сағаткүл Рақышқызы – ұл-қыздарын тәрбиелеп өсіріп, бүгінде немере көріп, шөбере сүйіп отырған бақытты ана. Ұлы Ермұрат Дәрібаев Жамбыл жол дистанциясы бастығының орынбасары болып қызмет етеді. Жұмысқа деген жауапкершілігінің жемісін көріп жүр.