Теміржолшы Мақсат Абатов «Самұрық-Қазына» спартакиадасынан алтын және күміс жүлдемен оралды
"Қазақстан теміржолшысы" газетінің Жамбыл облысындағы меншікті тілшісі
«Самұрық-Қазына» компаниялар тобы Х спартакиадасында волейболдан ҚТЖ құрамасының сапында сынға түскен Тараз станциясының маневрлік диспетчері Мақсат Абатов республикалық жарыстан бір алтын, бір күміс жүлдемен олжалы оралды.
Жалпыкомандалық есепте Қазақстан темір жолы құрамасының алға шығып, 1-орынды жеңіп алуына волейболшылардың қосқан үлесі зор. Олай дейтініміз, ірі жарыстарда командалық ойынның жүлдесі үшін қосылатын ұпай едәуір.
– Спартакиада өте тартысты өтті. Біздің Жамбыл жол бөлімшесінен төрт адам бардық. Садақ ату және ерлер арасындағы волейболдан ҚТЖ командасының намысын қорғадық. Ерлер арасындағы волейбол құрамасына Жамбылдан екі теміржолшы шақырту алғанымызбен, әріптесімді бас жаттықтырушы сапқа қоспады. Біз үшін шешуші кездесу «QazaqGaz»-бен өткен ойын болды. Жанкүйерлер «финалға бергісіз матч» деп баға берді. Қарсылыстарымыз өте мықты команда, оңай соққан жоқ. Дегенме, жақсы тактика, дайындықтың арқасында жеңіске жетіп, жартылай финалға шықтық. Қола жүлдені олжалап, үздік үштікті түйіндедік, – дейді Мақсат Абатов.
Мақсат Абатов білікті маман ғана емес, мықты волейболшы. Волейболдан Жамбыл жол бөлімшесі командасының капитаны бірнеше жылдан бері ҚТЖ құрамасының сапына жиі шақырту алады. Бұған дейін де республикалық жарыстарға қатысып, жүлдемен оралған.
Дүбірлі додадан осындай жеңіспен мерейі үстем болып оралған теміржолшыны жергілікті басшылық құттықтап, кәсіподақ тарапы «Қазақстандық салалық теміржол, автомобиль, әуе және су көлігі қызметкерлерінің кәсіби одағы» қоғамдық бірлестігінің 120 жылдыққа арналған мерейтойлық медальмен марапаттады.
