Тәлімгерлік мектеп және теміржолшылар династиясы

Теміржол саласында меритократия қағидаты орныққан деуге болады. Яғни, қабілет пен еңбек – шешуші фактор. Өйткені бұл – тәуекелге баратын сынақ алаңы емес. Мұнда қарапайым маманнан бастап сатылап тәжірибе жинамаса, қиын да жауапты жұмыстың қыр-сырын бір күнде біліп-үйреніп кете алмайды.

Сонымен қатар теміржол – ұрпақтар сабақтастығы кеңінен қанат жайған сала. Теміржолшы кәсібі бірнеше буын үзілмей атадан балаға мирас болып, әулетімен осы салада еңбек ететін династиялар көп. Жамбыл магистральдық желі бөлімшесі – Жамбыл белгі беру және байланыс дистанциясының бастығы Нұрғали Терлікбаев үлкен теміржолшылар әулетінде өскенін мақтан тұтады. Сонау 90-жылдары, осыдан 33 жыл бұрын еңбек жолын осы дистанцияда электрмонтер болып бастаған Нұрғали Орысбайұлы Тараз көліктегі оқу орталығында оқып, кейін өндірістен қол үзбей жоғары оқу орнын сырттай бітіріп, сатылай өсіп бүгінгі дәрежеге жеткен.  

– Осы саладағы жұмыстың барлық сатысынан өттім. Электрмеханик, аға электрмеханик, жеті жыл еңбек қауіпсіздігі және еңбекті қорғау инженері, 16 жыл бас инженер қызметтерін атқарып, үш жылдан бері дистанцияны басқарып келемін. Айтайын дегенім, ең алдымен алдымдағы аға буын тәлімгерлердің тәжірибесінен үйренгенім көп. Теміржолда кешегі кеңестік кезеңде тәлімгерлік мектебі қатты дамыды, соңғы жылдары қайта қолға алынып отырғаны қуантады. Біздің буын – сол аға буын тәрбиелеген тәлімгерлік мектеп түлегіміз. Ол дегеніміз – бірнеше институт бере алмайтын білім мен тәжірибе, – дейді дистанция бастығы.  

Айтуынша, биыл оқу бітірген 12 жас маман дистанцияға жұмысқа қабылданыпты. Оларға арнайы тәлімгер бекітіліп, арнайы курстарда оқып, теория мен тәжірибені ұштастыруларына барлық жағдай жасалған.  

– Оқуды жаңа бітіріп келген жастарды көргенде 33 жыл бұрынғы өзімді көргендей боламын. Атам темір жолдың оқуын оқыған жоқ, Түрксіб құрылысына қатысты, әкем 43 жыл жолшы, жол бригадирі, жол шебері болып еңбек етті. Бірақ олардың тәжірибесі өз алдына бір мектеп еді. Ал бүгін біз сол аға буыннан қабылдаған эстафетаны алға жылжытып, жас буынды үйретіп, тәрбиелеп, тәжірибе бөлісуіміз қажет. Тәлімгерлік мектеп, ұрпақтар сабақтастығы дегеніміз осы, – дейді Жамбыл белгі беру және байланыс дистанциясының бастығы Нұрғали Терлікбаев.  

Сонымен қатар дистанция қызметкерлері өз саласы бойынша біліктіліктерін арттыру курстарына тұрақты жіберіліп тұрады. Жақында ғана шалғай станцияларда еңбек ететін 7 электрмонтер Тараз көліктегі оқу орталығында оқып, емтихан тапсырып келген.