Инновациялық идеялар жаршысы
"Қазақстан теміржолшысы" газетінің Жамбыл облысындағы меншікті тілшісі
Еңбектің лайықты бағалануы – кез келген саладағы кадрлық құрамды тұрақтандыруға әсер ететін маңызды фактор. Шу локомотив пайдалану депосының нұсқаушысы Олег Ермиловтың есімі теміржолшы қауымға жақсы таныс. Өнертапқыш, мықты инноватор, жаңашыл идея мен жарқын бастамалар көшбасшысы ретінде танымал болған тұлға.
Биыл Олег Ермиловтың саланың мәртебелі марапатын алып, «Құрметті теміржолшы» атануын әріптестері зор қуанышпен қабылдады. Бұл – отыз жылдық адал еңбектің, тынымсыз ізденістің жемісі деп санайды. Теміржолшыға берілетін ең биік марапат өз иесін тапқанына қуануда.
Тәуелсіздіктің елең-алаңында, тоқсаныншы жылдардағы қиындықтарға қарамай, теміржол саласына жұмысқа орналасып, Шу локомотив депосында тепловоз машинисінің көмекшісі болып еңбек жолын бастаған кейіпкеріміз 1997 жылы негізгі құрамнан бөлініп қалған он вагонды тауып, пойызды тоқтатып, диспетчердің нұсқауымен вагондарды тіркеп, діттеген жеріне жеткізгенде сала басшылары Олег Ермиловтың темір жолға кездейсоқ келмеген жан екенін мойындаған. Содан бері отыз жылға жуық уақыт ізденіспен, оқу-тоқумен, еңбекпен өтіп жатыр. Өз кәсібін жетік меңгеруге кіріскен ол өндірістен қол үзбей білімін көтерді. Электровоз машинисі курсында оқып, емтихан тапсырған соң 1998 жылдан бастап алдымен жүк пойызында, кейін жолаушылар пойызында электровоз тізгіндеп, 2010 жылға дейін еңбек етті.
Олег Ермилов қырағылығының арқасында талай қауіп-қатердің алдын алады. Сондай оқиғаның бірі 2008 жылы болған еді. №52 пойызбен келе жатқан машинист шойын жолда рельстің сынғанын дер кезінде байқап, пойызды тоқтатып үлгереді.
Тынымсыз ізденіс үстінде жүретін маман 2011 жылы өзін мықты инноватор ретінде көрсетті. Астана қаласында өткен Инновациялық технологиялар форумында оның KZ4A электровоздарының ақауларын анықтау бойынша әзірленген автоматты жүйесі үздік деп танылды.
– KZ4А электровоздарының ақауларын анықтайтын құрылғы локомотив бригадаларына машиналардың жұмысындағы ақауларды санаулы секундтарда жою дағдыларын пысықтауға мүмкіндік береді. Оқу стендінде бір-бірімен байланысқан және локомотивтің борттық компьютерінің нақты бейнесіне сәйкес келетін 12 ұяшық бар. Суреттердің көмегімен машинист жұмыс кезінде тартқыш және жылжымалы жабдықтарды, агрегаттардың жұмысын серфингсіз басқара алады, – деп түсіндірді Олег Ермилов өзі жасап шығарған автоматты жүйе туралы.
Депо бастығының пайдалану жөніндегі орынбасары Мейірхан Орысбай бүгінде локомотив бригадаларының нұсқаушысы Олег Ермиловтан жастардың үйренері көп екенін айтады.
– Оның еңбек тәжірибесін тек шулық теміржолшылар ғана емес, басқа өңірлердегі әріптестері де үлгі тұтады. 2011 жылы ҚТЖ бойынша таратылған теміржол көлігіндегі тежегіштерді басқару жөніндегі нұсқаулықты әзірлеуге қатысқаны, 2013 жылы компания қызметкерлерін оқытуға тренажерлер сатып алу үшін Францияға іссапарға жіберілгені – оның деңгейін көрсететін дәлел, – деді депо бастығының орынбасары.