Маңғыстаудағы қалпына келтіру пойызы дайындықтарын пысықтады
Маңғыстау облысы бойынша меншікті тілші
Түбек теміржолының өртке қарсы қызметі мен қалпына келтіру пойызы Қостанайдағы жағдайға байланысты өз дайындықтарын тағы бір ширатып, солтүстіктен шақырту болса, көмек қолын созуға «стартта» тұр.
Маңғыстау теміржолындағы мемлекеттік емес өртке қарсы қызметінің бастығы Қайырхан Таласовтың айтуынша, солтүстіктегі өңірге көмек қажет десе, дереу жолға шығуға әзірліктерін пысықтап қойыпты. Өңірдегі үш өрт сөндіру пойызы – Бейнеу станциясында – 17, Маңғыстау станциясында – 13, Болашақта 10 адамы бар өрт сөндіру пойыздары дайындық сапында тұр.
Маңғыстау теміржолының №12 қалпына келтіру пойызының шебері Ербол Мүсірхановтың сөзіне сүйенсек, мекеме қажетті отын, жанар-жағармаймен толықтай қамтылып, жолға шығуға бұйрық болса, қырық минуттың ішінде аттанып кетуге әзір.
– Қалпына келтіру техникалары, крандар өз функциясына сай жұмыс істеп тұр. 125 тонналық кранымызға маусым айында техникалық қызмет көрсетілді. Бір вагонымыз осы айда деполық жөндеуден өтіп келуі керек. Қалған вагондарымыздың бәрі тексеріліп, қауіпсіздік жағдайлары пысықталған, – дейді Ербол Мүсірханов.
Қалпына келтіру пойызында екі кран бар, бірі 125 тонна, екіншісі 60 тонналық. Екі үлкен бульдозер, екі жүк тиегіш техника. Жалпы, пойыз 10 вагоннан тұрады. Оның екеуі жолсерігі, төсек жабдықтары бар тұрмыстық вагон. Қалғаны екі платформа, шағын тракторларға арналған екі гараж, электростанция вагоны, кранның қажетті бөлшектері салынатын және басқа да құрылғылар қойылатын вагондар.