Түрксіб станциясында терроризмге қарсы жаттығу өтті (Фото)
Тараз қаласы бойынша меншікті тілші
Түрксіб станциясында терроризмге қарсы және азаматтық қорғаныс бойынша оқу-жаттығу шарасы өтті.
Жаттығу алдын ала құрылған сценарий бойынша өтсе де, құрылымдардың өзара іс-қимылын пысықтап, шеберліктерін шыңдаған сабақ болғаны анық. Алдымен вокзалдағы жолаушылар қауіпсіздігі қамтамасыз етіліп, залалсыздандырылды. Оларға тиісінше әлеуметтік және медициналық көмек көрсетілді. Шараға ҰҚК, ТЖД, Желілік ішкі істер бөлімі, ҚТЖ Әскерилендірілген темір жол күзеті және медицина орталығының өкілдері қатысты.
– Түрксіб станциясы – тоғыз жолдың торабына орналасқан маңызды стратегиялық нысанның бірі. Жүк және жолаушылар қауіпсіздігі аса маңызды. Бүгінгі жаттығу салаласы құрылымдардың кез келген жағдайда оңтайлы қимыл жасап, қауіпсіздікті қамтамасыз ете алатынын көрсеткен шара болды және жоғары деңгейде өтті деп қорытындыланды, – дейді Жамбыл бөлімшесі бойынша Терроризмге қарсы бөлімнің бас маманы Данияр Ташметов.
