Сталинград майданының жауынгері

Ұлы Жеңістің 80 жылдығына орай Тараз теміржол колледжінде осы білім ошағынан түлеп ұшқан соғыс және еңбек ардагерлеріне арналған ашық тәрбие сағаттары өтуде. Солардың бірі Сталинград майданының жауынгері Садықбек Егембердиев соғыстан кейін көп жыл Жамбыл локомотив депосында еңбек етіп, зейнетке шыққан соң осы білім ошағында ұстаздық еткен.  

1940 жылы теміржол училищесі ретінде қайта құрылған Фабрика зауыттық оқыту мектебін теміржолшы мамандығы бойынша бітірген алғашқы түлектер қатарында Садықбек Егембердиев әскер қатарына шақырылып, азаматтық борышын өтеп жүргенде соғыс басталып кетеді.    

Дерекке сүйенсек, 1942 жылы училищеден 100-ден аса түлек соғысқа шақыру алған екен. Жартысынан көбі майдан даласынан оралмаған. Елге аман келгендері теміржол саласында еңбек етіп, өздері білім алған оқу орнына ұстаздық еткендері де аз емес.    

– Ардагерлердің өмір деректерінен құжаттардың көшірмелері мен тұтынған заттарын жинап, колледждің музейіне қойып жатырмыз. Садықбек Егембердиев 1940 жылы училищені «Паровоз машинисінің көмекшісі» мамандығы бойынша бітірген. 1942 жылы Кеңес әскерінің қатарына алыныпты. Соғыс басталғанда Саратов қаласында 3 айлық курста оқу-жаттығудан өтіп, одан әрі Сталинград майданына жіберілген, – дейді оқу-өндіріс шебері, колледж музейінің меңгерушісі Гүлжан Керменбаева.

Сталинград – Ұлы Отан соғысындағы шешуші майданның бірі болғаны мәлім. Сондай қанды шайқастардың бірінде Садықбек жараланып, госпитальға түседі. Бірнеше ай емделіп шыққан соң  НКВД колонна әскерінің 228-полкі құрамында қайта шайқасқа кіреді. Одан әрі Украина, Румыния, Польша, Германиядағы шайқастарға да қатысып, соғысты сержант шенімен аяқтаған Садықбек Егембердиев елге тек 1950 жылы наурыз айында оралады. Елге келген соң Жамбыл локомотив депосына машинист көмекшісінен бастап,  машинист, инструктор, депо бастығының орынбасары болып ұзақ жыл еңбек етіп,1979 жылы зейнетке шыққан соң көп жыл бір кезде өзі оқыған теміржол училищесінде «Машинист көмекшісі» мамандығы бойынша өндірістік оқыту шебері болды. «Сталинградты қорғағаны үшін», ІІ дәрежелі «Ұлы Отан Соғысы» ордендерімен және «Еңбек Қызыл Ту» және «Құрмет белгісі» ордендерімен, «Құрметті теміржолшы» белгісімен марапатталған соғыс және еңбек ардагері 2018 жылы 94 жасында дүниеден озды.