Ешкім де, ештеңе де ұмытылмайды

Биыл бейбіт халықтың басына бұлт үйіріп, өлім отын шашқан сұм соғыстың аяқталып, Ұлы Жеңіс туының желбірегеніне – 80 жыл. Соғыс жылдарында майданда да, тылда да ерліктің хас үлгісін танытып, жеңісті жақындатуға зор үлес қосқан саланың бірі – темір жол және оның еңбеккерлері – теміржолшылар.

«Қазақстан темір жолы» ҰК» АҚ мен оның еншілес ұйымдары соғыс кезінде және одан кейін темір жолда тер төккен ардагерлерді ешқашан ұмытқан емес. Жыл сайын Ұлы Жеңіс күні қарсаңында оларды ұлықтап, мерекелік көңіл күй сыйлайды. Бұл дәстүр биыл да жалғасын табады.  

Бүгінде «ҚТЖ» ҰК» АҚ компаниялар тобы бойынша есепте барлығы 8 ҰОС ардагері тұр. Олар: Астана станциясынан Василий Сердюков, Қостанайдан Андрей Шаров, Павлодардан Василий Григораш, Қарағандыдан Григорий Степенко, Шымкенттен Қалмен Мұратов, Ақтөбеден Александра Саратовцева, Оралдан Борис Шолубай, Ақмоладан Арсентий Щудляк. Бұдан бөлек Ленинград блокадасының 3 қатысушысы, 5 концлагерь тұтқыны, 1 ҰОС ардагерінің жесірі және 1000-ға жуық тыл еңбеккері бар. ҚТЖ тарапынан Жеңіс күніне орай ҰОС ардагерлеріне 50 ЕАК мөлшерінде материалдық көмек берілді. 6 мамыр күні ардагерлерге Астанадағы Отан қорғаушылар алаңында «Мәңгілік алауға» гүл шоғын қою рәсімі ұйымдастырылып, мерекелік түскі ас беріледі. Сонымен қатар «Ардагерлерді ардақтайық» акциясы шеңберінде ҚТЖ еріктілері соғыс және тыл ардагерлеріне қажетті азық-түлік себеттерін таратпақ. 9 мамыр қарсаңында бұл шараға өңірдегі теміржолшылар да үлес қосып, ардагерлерді үйлеріне барып құттықтап, сый-сияпаттарын тарту етеді.  

Жеңіс күнінің рухын теміржол көлігін пайдаланушы жолаушылар да сезіне алатын болады. ҚТЖ пойыздарының мультимедиялық порталында ҰОС қатысушылары мен батырлары туралы тарихи хроникалар, фильмдер, патриоттық сюжеттер көрсетілетін болады. Ал мамыр-желтоқсан аралығында «Саламатты Қазақстан» арнайы пойызы аясында шалғайдағы елді мекендерде тұратын соғыс және тыл ардагерлеріне көшпелідиагностикалық шаралар арқылы медициналық қызмет көрсетілетін болады.  

Тағы бір атап өтетін жайт, биылғы 15 сәуірден бастау алған «Соғыстың соңғы сарбаздары» ақпараттық кампаниясы 10 мамырға дейін жалғаспақ. Бұл тақырыптағы постерлер Компания қызметкерлерінің жұмыс компьютерлерінің экрандарында және әлеуметтік желілерде үзбей беріліп келеді.  

«Бұл постерлерде Жеңісті жақындатуға үлес қосқан жауынгерлердің ерлігі мен тағдырлары баяндалады. Әрбір постер – батырлық тарихын, еңбек ерлігін және Отанға деген сүйіспеншілікті паш етеді. Кейінгі ұрпақ кешегі өткен соғыс тарихын, ата-баба ерлігін білуі керек. Өйткені ешкім де, ештеңе де ұмытылмайды», – дейді Ұлы Жеңіс күніне қатысты іс-шараларды ұйымдастырушы «ҚТЖ» ҰК» АҚ Әлеуметтік саясат департаментінің өкілдері.