Теміржол тарихына саяхат
Ақтөбе облысы бойынша меншікті тілші
Ақтөбедегі теміржол мұражайына жас туристер келді. Оларды ескі байланыс құралдары мен станция қоңырауы сынды көне жәдігерлер ерекше қызықтырды.
Экскурсия барысында балалар пойыз макеттерінің маңында ұзақ аялдап, олардың қалай жұмыс істейтінімен танысты. Әсіресе ғасырлық тарихы бар станция қоңырауы оқушылардың ерекше қызығушылығын оятты. Олар ертеде пойыздың келуі мен кетуін хабарлаған қоңырауды соғып көріп, ұзақ тамашалады. Мұражайдағы ескі телефондар да жас қонақтардың назарынан тыс қалмады. Оқушылар байланыс құралдарының дыбыс шығару тәсілін, сөйлесетін бөліктерін қызықтап, көп сұрақ қойды.
Музей менеджері Данагүл Асанованың айтуынша, Ақтөбе теміржолына қарасты мұражай 1989 жылы құрылған. Бұл мұражайда Батыс Қазақстан теміржолының даму жолын көрсететін 400-ге жуық жәдігер сақталған. Олардың қатарында тарихи фотосуреттер, құжаттар, теміржолшылар пайдаланған құрал-жабдықтар мен түрлі макеттер бар.
– Осындай экскурсиялар арқылы жас ұрпақ теміржол тарихын таниды. Саланың ел дамуына қосқан үлесін, маңызын жақынырақ түсінеді. Есігіміз әрдайым ашық. Оқушылар тұрақты келіп тұрады, – деді Данагүл Асанова.