Практикалық семинар: «Менің идеалды жұмыс ортам»
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесінің ұйымдастыруымен өткен практикалық семинарда қатысушылар әр қызметкер армандайтын идеалды жұмыс ортасы қандай екенін кейстік ойындар арқылы анықтады.
Еңбек қауіпсіздігі және еңбекті қорғау, экология жөніндегі инженерлерге, жалпы еңбек ұжымдарының басшыларына еңбекті қорғаудағы қолайлы психоәлеуметтік көңіл күй қалыптастырудың мән-маңызын түсіндіріп, оның тиімді жолдарын ұсынуды көздеген бір күндік оқыту курсы өзгеше форматта өтті.
Практикалық семинарды ашқан Жамбыл магистральдық желі бөлімшесінің бас инженері Дастан Садықов еңбек ұжымдарында кездесетін психоәлеуметтік жағдайлардың себебін қатысушылармен бірге талқылады.
– 28 сәуір – бұл еңбекті қорғауда қауіпсіз жұмыс жағдайларын жасаудың маңыздылығын еске салатын күн. Қауіп-қатердің алдын алу дегеніміз – тек қана техника, ережелер мен нұсқаулар емес. Әр жұмысшының психологиялық жағдайына мән беру, ұжымдағы қарым-қатынасымыз және біз жұмыс істейтін жайлы атмосфераны қалыптастыру. Қызметкер өзін қауіпсіз сезінгенде, оның пікірі ескеріліп, жұмыс күші бағаланады. Ол тиімдірек жұмыс істейді, аз қателеседі және дамиды. Бұл бүкіл ұжымның нәтижелеріне тікелей әсер етеді. Сондықтан біз еңбек ұжымында туындайтын стрестік жағдайларды азайту, қызметкерге қысымды болдырмау, сенім мен ашық қарым-қатынас орнату жолдарын бірге талқылаймыз, – деді Дастан Ербайұлы.
Бөлімшенің еңбекті қорғау, өнеркәсіптік қауіпсіздік және экология секторының бөлім бастығы Көбейсін Әбжами еңбекті қорғаудың барлық техникалық нормалары сақталса да, қызметкерлердің психологиялық жағдайы ұжымдағы қауіпсіздікке, өнімділікке және атмосфераға тікелей әсер ететінін айтады. Сондықтан практикалық семинарда еңбек ұжымдарында кездесетін осындай фактілердің алдын алу жолдарын түсіндіру кейстік ойын форматында ұсынылғанын атап өтті.
– Жұмыс орнындағы негізгі психоәлеуметтік тәуекелдер: стресс, эмоционалды күйіп кету, ұрыс-керістер, қысымның қандай жағдайларға әкеліп соғатынын теориялық тұрғыда ғана емес, арнайы ұйымдастырылған кейстік ойындар барысында бірге талқыланды. Қатысушылар командаларға бөлініп, ситуациялық жағдайлардан шығу жолдарын бірлесе іздеп, өз шешімдерін ұсынды. «Менің идеалды жұмыс ортам» деген тақырыптағы блиц-ойында өз ойлары мен ұсыныстарын ашық жазды.
Семинар соңында бірінші кезекте жыл ішінде еңбекті қорғау мәселелерінде сергектік танытып, жұмысында үздік шыққан инженерлер мен белсенді қатысушылар Алғыс хаттармен марапатталып, «Қазтеміржолкәсіп» ҚБ-нің Жамбыл филиалы атынан сыйлықтар табысталды, – деді Көбейсін Ақтанұлы.
Жұмысшының әлеуметтік көңіл күйінің тұрақсыздығынан, психологиялық қысымның әсерінен назары басқа нәрсеге ауып, жұмысына селқос қарауының салдарынан еңбек өнімділігі төмендеп, техникалық қателіктерге жол беріп, жарақат алып қалуы мүмкін. Сондықтан еңбекті қорғауда қолайлы психоәлеуметтік ортаның болуы маңызды.
