Абай облысында Дегелен вокзалын қайта жаңарту аяқталды
Нысан Мемлекет басшысының тапсырмасы бойынша іске асырылып жатқан елдің теміржол вокзалдарын жаңғырту бағдарламасы шеңберінде жаңартылды, деп хабарлайды Rail-news.kz.
1953 жылы салынған вокзал ғимараты толығымен бөлшектелді. Оның орнына жаңа заманауи ғимарат салынды. Вокзал аумағы үш есеге – 324 шаршы метрге дейін ұлғайды, бұл жолаушылар аймақтарын кеңейтуге және қызмет көрсету жағдайларын жақсартуға мүмкіндік берді.
Жаңарту барысында ғимараттың қаңқасы тұрғызылып, қазақстандық өндірістің заманауи материалдарын пайдалана отырып, ішкі және сыртқы әрлеу орындалды. Сыртқы сумен жабдықтау және кәріз желілері жаңартылып, ішкі инженерлік коммуникациялар ауыстырылды және жаңғыртылды.
Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Абай облысы әкімдігі қолдауымен «Қазақстан темір жолы» ҰК» АҚ-ның өз қаражаты есебінен қаржыландырылды.
Бүгінде Дегелен станциясы елді мекенді Семей, Астана, Бейнеу, Маңғыстау, Алматы, Павлодар, Қарағанды және Қандыағаш станцияларымен байланыстыратын сегіз жолаушылар пойызына қызмет көрсетеді.
Жаңартылған вокзал жолаушылар мен теміржол қызметкерлері үшін ыңғайлы және қауіпсіз жағдай жасайды. Қайта жаңарту нысанды заманауи талаптарға сәйкестендіруге және өңірдің теміржол инфрақұрылымының келбетін жаңартуға мүмкіндік берді.