Үлкенге құрмет – ұрпаққа міндет
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының ұйымдастыруымен құрылымдық бөлімшелердегі бастауыш ұйымдар жыл сайын 1 қазан – Халықаралық қарттар күніне орай ардагер теміржолшыларға сый-құрмет көрсетуді дәстүрге айналдырған. Биыл да бұл үрдіс жалғасын тапты.
«ҚТЖ – Жүк тасымалы» ЖШС «Жамбыл» филиалының директоры Айдын Сеитбенбетов сала ісін дамытуға өлшеусіз үлес қосқан ардагер теміржолшыларға алғыс білдірді.
– Сіздер, қиын-қыстау кезеңдерде қажымай, талмай, табандылықпен жұмыс істеп, нағыз адал еңбектің үлгісін көрсеттіңіздер! Алдыңғы толқынның өнегесі кейінгі толқынға басты бағдар болып қала бермек, – деді Айдын Пайзылдаұлы.
Кезінде аға буынның тәлімін алып, тәжірибесін үйренген орта буын өкілдері қарияларға игі тілектерін арнады.
– Бүгінгі ақ дастархан басындағы кездесуге филиалда және құрылымдық бөлімшелерде әр жылдарда жұмыс істеген 100 теміржолшы жиналды. Бұл – жыл сайын ұйымдастырылып отыратын дәстүрлі үрдіс. Бұдан бөлек, тағы да 100 ардагерге азық-түлік себеттерін тарту еттік. Орталықтағы ұйымдарда еңбек еткен 70 қарияны, ал Шу локомотив пайдалану депосы 30 қартты арнайы барып құттықтап, сый-сияпат жасады, – дейді «ҚТЖ – Жүк тасымалы» ЖШС «Жамбыл» филиалы кәсіподақ ұйымының төрағасы Серік Наурызбаев.
Емен-жарқын естеліктер айтылып, әуезді ән шырқалған кездесу ардагерлер көңілінен шықты.