Теміржолда жарты ғасырдан астам уақыт еңбек еткен ардагер 80 жаста
Ақтөбе облысы бойынша меншікті тілші
Батыс Қазақстан теміржолшыларының ұстазы Бисенбай Майсутов 80 жаста. Отандық темір жолдың, оның ішінде тоғыз жолдың торабында жатқан батыс аймақтық магистральда өшпес қолтаңбасы қалған ардагер жарты ғасырдан астам өмірін осы салаға арнаған. Бисенбай Қонқақұлы Кеңес үкіметі тұсында-ақ "Құрметті теміржолшы" атанды. 1941 жылдың 23 желтоқсанында Шалқар қаласында өмірге келіп, Қандыағаш қаласында өсіп-жетіліп, ұзақ жыл Батыс аймақтағы вагон шаруашылығын басқарған азаматты аймақта танымайтын теміржолшы кемде-кем.
«1959 жылы мектеп бітіріп, Ташкенттегі теміржол институтына түсуге бардым. Ол кезде заман басқа еді. Практикалық тәжірибе болмаса оқуға алмайды. 18 жасқа толмаған тәжірибесіз жастарды кешкі оқуға қабылдап, Ташкенттегі тепловоз жөндейтін зауытқа апарды. Күндіз жұмыс істейміз, кешке оқимыз. Екі жылда алты цехтан өттім. Зауыттың ішінде жұмыспен толық танысып, үйреніп, дайын маман болып шықтық. Теориялық білім өз алдына. Үшінші курсқа келгенде күндізгі бөлімге ауыстым. Осылайша 1965 жылы институтты бітіріп, жолдамамен Шұбарқұдық локомотив депосына келдім», – деп еске алады ардагер өткен күнді.
Шұбарқұдық депосынан кейін еңбек жолы Қандыағаш депосында шебер болып жалғасады. 1967 жылы шаңырақ көтеріп, бір жылдан соң Алматыдан Гурьев бөлімшесіне жіберілсін деген бұйрық келіп, аға инженер болып ауысады.
«Онда сегіз ай жұмыс істеген соң Гурьев бөлімшесінің бастығы Сексенбаев Тәжбен Өмірзақұлы шақырып, Гурьев локомотив депосының басшысы қызметін ұсынды. Ол кезде бар болғаны 27 жастамын», – дейді ол.
Алғашында кәсібі вагон шаруашылығы екенін айтып бас тартқанмен келісуге тура келеді, басшылық білікті маман тапқан соң қайта ауыстыруға уәде береді. Айтқанындай, 1969 жылдың мамыр айында вагон депосының бас инженері болып ауысып, әрі қарайғы өмірі тек осы саламен байланысты өрбиді. 2012 жылы зейнетке шыққанша вагон шаруашылығының «отымен кіріп, күлімен шығып» дегендей, аянбай еңбек етеді. Құдайға шүкір, абыройлы болды, теміржолдағы талай тар жол, тайғақ кешуді бастан кешті, қаншама шәкірт тәрбиелеп өсірді. Ол рас. Батыс Қазақстан теміржолшыларының ұстазына айналған Құрметті теміржолшының шәкірттері көп-ақ екен. 80 жасқа толып отырған ұстаздарына құттықтау тілегін жолдап жатқандар қатарында Түсіпбек Қойшығұл, Құлахмет Төкешев, Сәкен Төлебаев, Аманбай Айтжанов сынды өз ісінің майталманы атанған теміржолшылар бар.