Теміржолшылардың да кәсіппен айналысуға мүмкіндігі бар

Теміржолшылардың да кәсіппен айналысуға мүмкіндігі бар. «ҚТЖ-Жүк тасымалы» ЖШС Батыс аймақтық филиалының директоры Бөріхан Беркімбаев Ақтөбе облысының әкімі Ералы Тоғжановпен бірге аймақтағы станцияларды аралап, теміржолшыларды «Ауыл аманаты» жобасының мүмкіндіктерімен таныстырды.

Аймақтағы қос басшы, облыс әкімі мен салалық ведомство жетекшісінің бірге ел аралауы жергілікті теміржолшы халық үшін де тиімді болды, барлық станцияда тұрғындармен кездесулер өтіп, шағым-тілектері тыңдалды. Ауылдағы елдің жайымен танысқан өңір басшысы әр адам ауқатты тұруға тырысуы керектігін айтты. Теміржолшыларды «Ауыл аманаты» жобасы мүмкіндіктерін пайдалануға шақырды. Кепілге қоятын мүлкі жоқ ауыл азаматтарының жағдайын жақсартуға бағытталған жобаның тиімділігін тәптіштей түсіндірді.

– Жағдайы жоқ азаматтарға тауарлы несие ешқандай кепілсіз беріліп жатыр. 3 мың 700 малды тұрмысы төмен халыққа таратып бердік. Бірінші жыл демалыс. Екінші жылдан бастап малдың төлімен қайтарады. Он сиыр алса, жылда төрт бұзаудан қайтара алады. Ешқандай кепілсіз, ақшасыз тауарлы несие алу мүмкіндігі жасалып отыр. Жұмыс істеуге ниет білдірген барлық азаматты қолдаймыз. Болашақ – орта және шағын бизнесте. Мұнайымыз бар кезінде бұл жұмыстарды жайлап жобаға қойып алуымыз керек. Бұл жерде жобаға қатысушы жұмыс жасамау керек деген талап жоқ. Жұмысыңды да істе, бос уақытта кәсіп ашып, шаруаңды да жүргіз, сондықтан теміржолшыларға да берілетін мүмкіндік, – деді Ақтөбе облысының әкімі Ералы Тоғжанов.  

Облыс басшысы «Ауыл аманаты» жобасы аясында теміржолшыларға 2,5 пайызбен несие беруге мүмкіндік жасалатынын, олар 8 миллион теңгеге дейін қаржы алып, ауласына жылыжай салып, қорасына мал, құс өсіре алатынын жеткізді. Мемлекет басшысының тапсырмасына орай бұл жобамен несие алғандарға бірінші жыл демалыс, яғни төлемейді.  

«ҚТЖ-Жүк тасымалы» ЖШС Батыс аймақтық филиалының директоры Бөріхан Беркімбаев ауылды, ауыл азаматтарының өмірін жақсартуға бағытталған жоба теміржолшылар арасында кеңінен түсіндіріліп, насихаттала бастағанын айтты. Ауыл тұрғындары ауласынан кәсіп ашып, тұрмысын түзей алатын жобаға қызығушылық танытуда екен.  

Сонымен қатар Қарауылкелді станциясының тұрғындары аймақтың екі бірдей басшысының келген сапарын пайдаланып, теміржол бойынан жаяу жүргіншілерге арналған көпір салу мәселесін көтерді. Ауыл балалары мектепке қатынау үшін темір жолды кесіп өтіп жүр. Қауіп-қатердің алдын алу үшін ауыл ақсақалдары өткел салу өзекті мәселе екенін ескертті.  

Бөріхан Сматуллаұлы Ұлттық компания тарапынан мұндай ұсыныстарға кедергі жоқ екенін, жоба құрылысын сызып беруге дайын екендерін айтты. Шамамен көпір құрылысына 85-90 миллион теңге жобасында қаржы кететіні ескертілді. Ұсынысты қолдаған облыс әкімі жауапты мамандарға құрылыс жұмыстары үшін қаржы қарастыруға тапсырма берді.