Тағы 52 бала «Таусамалы» лагеріне аттанды
Тараз қаласы бойынша меншікті тілші
Жамбыл жүк тасымалы бөлімшесі еңбеккерлерінің балалары үшін лагерьдің кезекті кезеңі басталды. Өткен аптада 52 бүлдіршін «Тау самалы» сауықтыру лагеріне аттанып кетті.
Жамбыл бөлімшесі кадрлар бөлімінің басшысы Меруерт Бейсенбекқызы балалардың қауіпсіздігі мен денсаулығы толық бақылауда екенін жеткізді.
– Биыл біздің теміржолшылардың балалары төрт кезең бойынша демалады. Шілденің соңғы аптасында екінші кезең легі «Тау самалы» лагеріне кетті. Олар 14 тамызға дейін демалады. Ал 4 тамызда үшінші кезең бойынша балалар Түркістан облысындағы «Машат» сауықтыру кешеніне аттанып, 6 тамызда төртінші кезеңмен балалар Алматы қаласындағы «Эдельвейс» лагерінде демалады, – дейді кадрлар басшысы.
Сондай-ақ биылғы жаз маусымында Жамбыл магистральдық желі бөлімшесіне қарасты теміржол мекемелері еңбеккерлерінің 230 ұл-қызы сауықтыру шараларынан өтеді. Осыған дейін 80 бала «Машат» сауықтыру кешенінде демалып келсе, 150 бала Ақмола облысы Шучинск-Бурабай курорттық зонасындағы «Лесная сказка» сауықтыру кешеніне аттанды.
– Тараз станциясынан теміржолшылардың балаларын №56 «Қызылорда-Көкшетау» бағытындағы жолаушылар пойызымен алып шықтық. Жолда Түрксіб, Шу, Сарышаған станцияларынан да балалар мінді. Бүлдіршіндер Көкшенің сұлу табиғатында он күн қызықты демалыстарын өткізетін болады, – дейді Жамбыл белгі беру және байланыс дистанциясының радиобайланыс электромеханигі, топ жетекшісі Ержан Ахметбеков.