Тыңдаңыздар, құрметті жолаушылар...
Үшінші мегаполис Шымкент қаласының бас қақпасы – теміржол вокзалынан күніне 15-16 мың адам өтеді. Вокзалға келіп-кетіп жүріп "Тыңдаңыздар, құрметті жолаушылар..." деп, пойыздардың келгені мен кеткенін хабарлап, басқа да ескертулер жасап жататын диктордың жағымды дауысы құлағымызда қалыпты.
Міне, бүгін арнайы іздеп келдік, сол дауысы жағымды бикештің алдында атырмыз. Шолпан Юсупова алдымен Арыс қаласындағы теміржол колледжінде оқып, сосын 2009-2011 жылдары М.Тынышпаев атындағы Көлік және коммуникация академиясын теміржолдағы жол қозғалысын басқару мамандығы бойынша сырттай бітіріп шыққан екен.
2011 жылы Шымкент вокзалына анықтама беру бөлімінің кезекшісі болып жұмысына тұрады. Бір жылдан кейін вокзал бастығы кезекшісінің көмекшісі болып тағайындалады. «2014 жылы хабарлаушы-диктор болып ауыстым. Содан бері осы жерде еңбек етіп келемін. Мұнда күндізгі, түнгі ауысым 12 сағат кезекшілікпен атқарылады. Жұмысқа таңғы сағат 8:30 келеміз. Кешкі сағат 9-ға дейін күндізгі пойыздардың келу-кету ретін хабарлап отырамыз, қандай да бір өзгерістер болса немесе пойыз кешіксе, жолаушыларды құлақтандырып отырамыз. Бұдан бөлек, теміржолдың қауіпті жер екендігін жолаушыларға ұдайы ескертеміз. Адамдар пойызға мініп-түсіп жатады, заттарын ұмыт қалдыратындары бар. Сондай кездерде жолаушылар келіп өтініп айтып жатады. Ауысым басшысы қалай бұйрық береді, солай хабарлама жүргізіп отырамыз», – дейді күнделікті атқарып отырған жұмысына шолу жасаған Шолпан.
Шымкент вокзалынан күніне 20-25 пойыз өтеді. Станция кезекшісі, диспетчерлер, операторлар пойыздың келген-кеткенін телефон арқылы хабарлап отырады, ал дикторлар оны халыққа микрофон арқылы жеткізеді. Вокзалдағы теміржолдан жолаушылар пойызынан бөлек жүк пойызы, кейде маневр пойызы, дрезиналар, тепловоздар да өтеді. Осындай сәттерде вокзал дикторы жолаушыларға техникалық сақтандыру, қауіпсіздік, заттарын ұмыт қалдырып кетпеу, касса мен анықтаманың қай жақта екендігін, басқа да қосымша хабарламаларды қазақ-орыс тілінде бірдей жеткізеді.
«Жұмыс қиын емес пе? Түнімен отыру деген әйел адамға қалай болады?» деген
сауалымызға «жоға, үйреніп калғам» деп жауап берді.
– Екі күн істеп, екі күн демаламыз. Вокзал – халықпен тікелей жұмыс жасайтын орын, сондықтан да халықпен жұмыс істеу, әрине, оңай емес, кейде пойыз кешігіп келеді деп хабарласаң да «неге кешігеді, себебін айт, неге сендер білмейсіңдер» деп айғай-шу көтеретін адамдар кездесіп жатады. Барлық жұмыстың өз қиындығы мен қызығы, ерекшелігі бар, оңай жерде нан жоқ, – дейді өмір тәжірибесіне сүйенген маман.
Осыдан біраз жыл бұрын перронда кішкентай 5-6 жастағы бала қалып кетіпті. Қасында ата-анасы жоқ, қайда барарын білмей жылап тұрған баланы бүкіл вокзал ұжымы болып жүріп зорға жұбатып, кезекші мен полицейлер ата-анасын іздеп, әлек болады. Сөйтсе, күтіп алған адамдар бір-бірін жетектеп таксиге мініп кете барған. Бір уақытта естеріне түсіп, қараса, бала жоқ, вокзалға қайта кері оралады ғой. «Келіп баланы алып кетті. Бала – ол зат емес, сөмке емес, қалай ұмытып кетті деп менің қатты таңырқағаным есімде» деп еске алды «қандай тосын оқиғаға куә болдың» деген сауалымызға орай.
Шолпанмен қоштасып сыртқа шыққанымызда қою қараңғылық түскен еді. Самаладай шамдары жарқыраған вокзалдан ұзай бере «Тыңдаңыздар, құрметті жолаушылар...» деген диктордың құлаққа жағымды қоңыр даусын естідік...
Жансая СЫДЫҚБАЙ, Шымкент
Суретті түсірген автор