Жас теміржолшылар еңбекші жастардың өңірлік форумына қатысты
Жастар жылы аясында ҚР Кәсіподақтар федерациясы облыс әкімшілігімен бірлесіп ұйымдастырған «Жас келсе – іске!»» атты еңбекші жастардың өңірлік форумына салалық және бастауыш кәсіподақ ұйымдары қатысты. Шарадан әрине, жамбылдық жас теміржолшылар да тыс қалмады.
Теміржолшы жастарды бастап келген Жамбыл ЖТ бөлімшесінің жастар ісі жөніндегі өкілі Дәулетбек Жолдасбаев бүгінде 12 мың теміржолшы еңбек ететін облыста соның 5 мыңнан астамы жастар екенін мақтанышпен жеткізді. Сондықтан аймақтағы мұндай басқосуда теміржолшы жастар қатары мол және мерейі үстем болатынын да жасырмады.
– Біздің компаниямыздағы жастар саясатына 10 жыл толғалы отырған шақта, биылғы жылдың Жастар жылы деп жарияланғаны бізді айрықша қуантты. «Қазақстан темір жолы» ұлттық компаниясы басшылығының бастамасымен «100 талантты жас теміржолшы» жобасы жарияланды. Бұдан бөлек, компания саладағы 28 мамандық бойынша «Жас кәсіби маман», «Болашақ басқарушылар» және «Менеджмент жобасы» сияқты жобаларды жариялап, кәсіби білікті және еңбексүйгіш жастардың үздіктерін іріктеп, ұдайы ынталандырып отырады, – деген жастар жетекшісі биылғы жылы ауыл жастарының мұң-мұқтажын зерделеп, көмектесетін бастамалар қолға алынуын ұсынды. Үш күнге созылған форумның мақсаты – еңбекші жастардың ең өзекті проблемаларын талқылау үшін коммуникативті алаң құру.
Сондай-ақ, еңбекші жастарды шоғырландыру, тәжірибе алмасу және өз идеяларын іске асыру, кәсіподақ қозғалысының жастар саясатын трансформациялау және дамыту бойынша тұжырымдамалық ұсыныстар әзірлеуді көздеді. Жастармен кездесіп, ой-пікірлерін тыңдап, тың идеяларына қолдау көрсету үшін алқалы жиынға ҚР Кәсіподақтар федерациясы төрағасының орынбасары Ерлан Сайыров, Ұлттық білім және инновация палатасының төрағасы Мұрат Әбенов т.б. қонақтар қатысты. Өз ой-пікірлерін ашық айтып, аға буын өкілдерімен бетпебет сұхбаттасып, тәжірибе алмасуға келген жастардың белсенділігі жоғары болды. Біз теміржолшы жастар өкілін сөзге тартып, биылғы жылдың жастар үшін қандай ерекшеліктері болып жатқанын, кәсіподақ тарапынан қаншалықты қолдау көріп отырғандарына қатысты сұрақтарымызды қойдық.
– Бүгінде елімізде жастарға арналған түрлі бағдарламалар қанат қақты. Солардың бірі – «Жастар – ел тірегі» атты жоба биыл жүзеге асып отыр. Бұл өз кезегінде жастардың тұрмысы мен табысын жақсартуға әсер етеді деп ойлаймын. Өз басым қызмет барысымен ауылдық жерлердегі шағын станцияларға жиі барып тұрамын. Сонда байқағаным, ауыл жастарына жұмыс тапшы. Осы форум алаңын пайдаланып, аймақтарда «Ауыл – ел тірегі» жобасының аясында ауыл жастарының мұңмұқтажын біліп, зерделейтін жұмыс жүргізілсе деген ұсынысымды айттым. Мәселен, жастарға жұмыс орнын ашатын кәсіпкерлер арасында түрлі байқаулар ұйымдастыруға болар еді, – дейді ол. Дәулетбек темір жолға жұмысқа тұрған жас мамандардың бәрі кәсіподақ мүшесі екенін жеткізді. – Мұның себебі, кәсіподақ мүшесі Компания басшылығы мен кәсіподақ ұйымы арасында жасалған ұжымдық шартта көрсетілген әлеуметтік жеңілдіктер мен кепілдіктерге ие болады. Осыдан кейін теміржолшы жастар тарапынан да болашаққа деген сенім туындап, адал еңбегімен қызмет етуге ынталандырары сөзсіз, – дейді жас теміржолшы. Жиын соңында форум жұмысы сессияда талқыланып, арнайы қарар қабылданды.
Жасұлан СЕЙІЛХАН