Арыс, біз сенімен біргеміз
Маусымның 24-і күні тоғыз жолдың торабында жатқан Арыс қаласының тұрғындары соғыс сұмдығын көзбен көргендей күй кешті. Іргедегі әскери бөлімшеде орын алған жарылыс алапат өртке ұласып, аспанға оқ-дәрі, атылған снарядтар ұшқыны бүкіл аумаққа тарап, үрейленіп дегбірінен адасқан адамдар үй-жайларын тастап үдере көшті. Ел басына сын сағат туды...
Өткен ғасырдың басында тартылған «Орынбор – Ташкент» теміржолының бойында қоныс тепкен Арыс қаласында 40-45 мыңдай халық тұрады. Кезінде «маршруттар фабрикасы» атанған, одаққа аты кеткен ірі теміржол торабы теміржолшылар тілімен Орта Азия қақпасы саналады.
Айтса айтқандай, нағыз тоғыз жолдың торабында орналасқан станция арқылы күніне 20-25 жұп жолаушылар пойызы зулап тоқтаусыз жөңкуде. Аймақтағы барлық жүк Арыста сұрыпталып, жан-жаққа жөнелтіледі. Сондықтан ежелден «теміржолшылар қаласы» атанған арыс халқының тең жартысы осы салада еңбек етеді десек болғандай. Теміржолшы кәсібін алғашқылар қатарында меңгерген арыстықтар, міне, бір ғасыр өтті, бүгінде ата кәсіптеріне айналған теміржолшы мамандығына адалдықтан айныған жоқ, Әуезхан Салықбаев, Әбдуәлі Балғымбеков, Сырлыбай Байжанов сынды Еңбек Ері атанған атақты теміржолшылар шыққан ел талай даңқты теміржолшылар әулетімен мақтана алады.
Сондықтан, осындай аса маңызды стратегиялық нысанда орын алған апат, ең алдымен теміржолшыларға қиындық туғызғаны рас. Апат салдарынан Арыста теміржол қатынасы тоқтатылып, нәтижесінде Арыс торабы арқылы өтетін бүкіл маршруттар жол-жөнекей тоқтатылып, Жамбыл мен Шымкентте, Түркістан мен Қызылордада сағаттап тұрып қалуға мәжбүр болды. Жағдайды ушықтырмауға тырысқан жергілікті және теміржол әкімшіліктері бірлесе қимылдап, жаңа бағдарлар ұйымдастырып, ортақ логистикалық тізбек құрды. Нәтижесі, міне, көпшілік көзбен көріп, куә болып отырғандар. Жолда қалған жолаушы жоқ, теміржол көлігі жеткен жерге дейін пойызбен, әрі қарай күтіп алған автобустарға мініп сапарын жалғастырған жолаушылар жолдарынан қалған жоқ. Осыдан бірнеше жыл бұрын салынса да жолаушы қатынасы жақсы дами қоймаған Бейнеу – Жезқазған теміржолының да қызығын көретін кез келіпті. КТЖ әкімшілігі негізгі күшті жаңа жолға бұрып, жолаушы тасымалы үшін Сексеуіл – Жезқазған телімін кеңінен пайдалануда.
Ал бүкіл Қазақстан теміржолшылары бірауыздан арыстық әріптестеріне біркүндік жалақыларын аударуға шешім қабылдады.