Тігін машинасына отырған теміржолшы

Бүгінде бүкіл әлем елдері коронавирус індетімен барынша күресіп жатқанда, теңізге тамшыдай үлес қосуға тырысып жатқан жүздеген-мыңдаған азаматтарды көріп шүкір, ел екенбіз, жұрт екенбіз дедік. Қазалы вагон пайдалану депосының үздік вагон қараушы-жөндеушісі Серік Шәденов жұмыстан бос уақытта тігін машинасына отырып, вирустан қорғайтын медициналық бетперделер тігіп, әріптестеріне тегін таратуда.

– Маскаң қайда? Берілген бетпердені қайда қалдырдың? Бәрің бетперде мен қолғап киіп жүретін болыңдар!...

– Жігіттер, кешегі пайдаланған бетперделеріңді бүгін вагонник Серіктен немесе профком Бақытжаннан жаңасымен ауыстырып алыңдар! Жұмыста да, үйде де жеке гигиенаны қатаң сақтаңдар, жұмыстан бос уақытта ешқайда шығуға болмайды, вагонға сервистік, техникалық қызмет көрсету кезінде профилактикалық сақтық шараларын ұстанып, бір-біріңмен арақашықтықты қатаң сақтаңдар!....

Бұл Қазалы вагон пайдалану депосы теміржолшыларының ауысым алдында, жұмысқа келгенде және жұмыс аяқталып үйлеріне беттеген кезде басшылық құрамнан құдайдың құтты күні еститін ескертулері. Мұның бәрі ҚТЖ басшысының «СОVID-19 індетінің таралуының алдын алу және сақтану» жайлы жариялаған пәрменіне қатысты депо бастығы Арғын Орымбаевтың 27наурыздағы №99 бұйрығына сәйкес жасалып жатқан сақтық шаралары.

Қазалылық вагоншылар ұжымында инфекциялы індеттен қорғанатын бетпердеге деген мұқтаждық жоқ десек болады. Алғаш осы қарапайым масканың тапшылығынан абдырап қалған вагоншылар депо басшысының, кәсіподақ ұйымының демеушілігімен жағдайды оңай игеріп, қиындықтан шығар жол таба білген. Дұрысы, өздерін өздері құтқарды...

Аймақта індеттің таралуына байланысты төтенше жағдай жарияланған кезде қарапайым қорғаныс бұйымы қат болып, халық тығырыққа тірелгені жасырын емес, тиын тұратын медициналық бетперденің бағасы шарықтап, дәріхана сөрелерінен лезде жоғалды. Осындай кезде Қазалы вагон пайдалану депосының вагон қараушы-жөндеушісі Серік Шәденов өз ауысымындағы теміржолшыларға бетперде тігіп беріпті деген сөз депо теміржолшылары арасында тез тарады. Депо басшылығы мен кәсіподақ ұйымы жетекшілері шебер жігітті лезде алдырып, оның жасаған маскасын көзбен көріп тәнті болды. Ақылдаса келе оған депо теміржолшыларына түгел бетперде тігуге өтініш айтылып, ісмер жігіт бұл өтінішті құп алды. Содан бері сарайда жатқан ескі тігін машинасын алдына өңгеріп алып, бос уақытта зырылдатып тігін тігіп отырған Секеңе өтініш айтушылар тіпті көбейді.

Қазалы вагон пайдалану депосының вагоншысы Серік Сейдуллаұлы он саусағынан өнер тамған бесаспап екенін енді біліп жатқандар қатты таңқалуда. Оның өндірістік жұмыс барысында кез-келген қиындықтан жол табатын шеберлігін, тәжірибесін бұрыннан білетін ұжымдастары тігіншілік өнері де бар екенін біліп қана қоймай, Серіктің тіккен медициналық бетперделерінің сапалылығын да сөз қылуда.

«Әйелдердің өзі бұлай тіге алмас! Өзі өте ыңғайлы екен…» десіп, осынау қиын кезде қажеттерін өтеген әріптестеріне ризашылықтарын жамырап жеткізіп жатты… – Аймақта жарияланған төтенше жағдайға байланысты Серік бетперде тігіп, бірге жұмыс жасайтындарға үлестіріп беріпті дегенді естіп, онымен жеке сөйлесіп келісімге келдік. Серіктің жұмыстан бос уақытында маска тігуіне қажетті заттарын алуына көмек бердік. Серктің осы азаматтық ісіне орай оны арнайы «Алғыс хатпен» марапаттадық. Тігілген маскалар сапалы әрі көп рет қолдануға жарамды, ұжым теміржолшыларына керекті мөлшерде үлестірілуде,–деді Қазалы вагон пайдалану депосының бастығы Арғын Орымбаев.

Ал Серік Сейдуллаұлының айтуынша, тігін машинасын ұстағаны бір бүгін емес, бұл оның бұрыннан жақсы көретін хоббиі екен.

– Жасырақ кезімде көп айналыстым. Анау мынау пішіп-тігу, қысқарту маған түк емес. Кеше мына індеттен сақтану қажеттігі туындады, бетперденің бағасы қымбаттап, оны табудың өзі қиынға айналды. Осыны өзім де тіге алатын болған соң қажетті материал тауып тігіп, алдымен мектеп жасындағы үш балама, сауап үшін ағайынға, ауысымдағы жігіттерге тараттым. Мұны ұжымдастарым естіп, басшылықтың қолдауымен оларға да маска тігіп, төрт ауысыммен жұмыс жасайтын әріптестеріме түгел жететін бетперде тіктім. Ең бастысы, ел аман, жұрт тыныш болсын, мынау індеттің бетін қайтару үшін әркім қолдан келгенін жасап жатыр ғой, – деді бесаспап теміржолшы Серік.