Атыраулық теміржолшылар марафонға қатысты

Атырау теміржолшылары спорттың қай түрінен болса да белсенді. Жуырда қала күніне орай өткен «Марафон Атырау-2022» жарысына, әрине, өңірдегі теміржолшылар да бір кісідей қатысты.

Қазақстанның түкпір-түкпірінен келіп, мыңға жуық адам қатысқан марафоншылардың қатарында Атырау вагон депосының операторы Г.Толыбаева, Атырау жүк тасымалы бөлімшесі экономика бөлімінің инженері Е.Максимов, Атырау локомотив пайдалану депосының машинист көмекшісі Р.Қайырлиев, Доссор станциясының бастығы Қ.Бекпенбетов, Мақат станциясының пойыз құрастырушысы Н.Сапаров, Мақат локомотив депосының машинисі Е.Жұпаров, Құлсары байланыс дистанциясының электромеханигі Н.Жұмекенов, тағы басқалар болды. Солардың ішінде Гауһар Толыбаева жуырда елордада өткен теміржолшылар арасындағы марафоннан жүлделі оралғанын жазғанбыз. Бұл жолы да марафоншы-теміржолшылар сапқа тұрып, 5, 10, 21 және 42 шақырымдық жарыстарда алдыңғы лектен көрінді. Жалпы, жұмысы қиын, жауапкершілігі жоғары темір жол саласында спортқа деген қызығушылық ертеден қалыптасып, талай чемпиондар теміржолшылар арасынан шыққанын ешкім жоққа шығара алмайды. Атыраулықтар жеңісі – оның айқын дәлелі.