Волейболдан іріктеу турнирі өтті
Атырау облысы бойынша меншікті тілші
Мамыр айында волейболдан «ҚТЖ» ҰК» АҚ чемпионаты өтеді. Соған орай сала кәсіподағы Атырау өкілдігінің және спорт нұсқаушыларының ұйымдастыруымен «Қазпрофтранс-2025» іріктеу турнирі өтті.
Спорт нұсқаушысы Ринат Иманғазиевтің айтуынша, оған аймақтарда алдын ала қызу дайындық жұмыстары жүргізіліп, іріктеу турниріне 9 команда қатысты. Олар: Атырау және Мақат локомотив пайдалану деполары, Мақат, Ганюшкино станциялары, Атырау, Ақжайық және Құлсары байланыс дистанциялары, вагон пайдалану депосы, электрмен қамту дистанциясы командалары. Әрине, командалар саны көп болған сайын ойын да тартысты өтеді, босаңсуға мүмкіндік болмайды. Өзіңе қарсылас сегіз команданы жеңіп шығу керек. Сондықтан да командалар барын салды.
Допты қақпақылдап қолдан қолға өткізіп, қарсылас команда алаңына ұрып, қапы кетпеуге тырысты. Бір жеңіп, бірі жеңіліп, ақырында жеңімпаздар да іріктелді. Бірінші орынды Атырау локомотив пайдалану депосының командасы жеңіп алды. Электрмен қамту дистанциясы 2-ші орынды иеленсе, Атырау сигнализация және байланыс дистанциясы 3-ші орынды місе тұтты. Жеңімпаз командалар кубокпен, диплом және ақшалай сыйлықпен марапатталды. Енді локомотившілер командасы чемпионатта аймақ намысын қорғайтын болады. Турнирдің өтуіне кәсіподақ ұйымы демеушілік көрсетті.