Қызылордалықтар экологиялық акцияларда белсенді
Қызылорда облысы бойынша меншікті тілші
«ҚТЖ-Жүк тасымалы» компаниясы бойынша өткен жыл «Экологиялық мәдениет жылы» болып жарияланып, аймақтарда экоакция, экомарафон секілді кешенді шаралар өткізілгені мәлім. Қызылордалық теміржолшылар да бұл шарадан тыс қалмады.
Бөлімшеде жыл бойы «Жина да өткіз», «Қалдық-кіріс», «Табиғатты қорға, батарейка өткіз» ұрансөзімен бірнеше акция ұйымдастырды. Соңғысында барлығы 14 тонна қолданылған батарейка өткізілген. Ал екі жүз теміржолшы атсалысқан «ағаш отырғыз» экологиялық акциясы аясында 229 ағаш көшеті, 120 дана гүл өсіріліп, жасыл табиғатқа өз үлестерін қосты.
Табиғи ортаны қорғау қызметіне қатысты қызылордалық (НОД және НЖС бөлімшелерінде) теміржолшылар өткен жылы тұрмыстық қалдықтарды шығару, қоршаған ортаға өндірістік бақылау мониторингі есебі, шығарындыларды аспаптық сынама және күл-қоқыс шығару секілді жұмыстарға 27 өлшем жасалып бөлінген қаржыны толықтай мақсатты игерген.
Сонымен қатар металл сынықтарына радиациялық бақылау жүргізу және экология мәселелері бойынша мамандарды оқыту шаралары да толық орындалған. Ауаға шығарылатын ластағыш заттардың қалдықтарына құзырлы органдар тарапынан өткен жылы 106,92 тоннаға рұқсат берілсе, ол 12 пайызға азайтылыпты, яғни 43,864 тоннаға кеміген.
Себебі бөлімше бойынша табиғи газдың қолданылу көлемі көбеюіне байланысты пайдаланылған көмірдің, сондай-ақ кептірілген құм көлемінің азаюы да әсер еткен. Қолданыстағы техника, құралдарды пайдалану кезінде ауаға бөлінетін газды азайту мақсатында да кешенді жұмыстар қолға алынған. Жылыту қазандығы, пеш секілді стационарлық нысандардан шығатын қалдық өткен жылмен салыстырғанда нысандардың көгілдір отынға көшірілуіне байланысты 5 пайызға кеміген. Автокөлікке жұмсалған жанар-жағармайдың шығынының азаюына байланысты қозғалыстағы көздерден шығатын қалдық 13 пайызға азайған.
Сонымен қатар, өндіріс және тұтыну қалдықтарын қағаз, шыны, пластик, т.т. бөліп, бөлек жинастырудың да пайдалы әсері аз емес екен. Пойызға тиелген жүктің белгілі-белгісіз себептердің әсерінен шашылуы, ағуы секілді факті өткен жылы екі рет орын алған. Оның бірінде тиелген жанармайдың шүмектен ағуы болса, екіншісі дәнекерленген жік жарықшағынан тамшылау тіркелгенмен, оның екеуінде де бөлімше теміржолшыла- рының кінәсі жоқтығы анықталған.