Нидерландыда машинистсіз жүретін маневрлік локомотив таныстырылды
Alstom компаниясы серіктестері – нидерландиялық ProRail теміржол инфрақұрылымы жөніндегі операторы және белгиялық Lineas жүк тасымалдау операторымен бірге автоматтандырылған GoA4 маневрлі локомотивін таныстырды. Аталған жоба бойынша серіктестер арасында келісімшарт 2020 жылы жасалған, деп хабарлайды Rail-news.kz.
Дизельді-гидравликалық өздігінен жүретін тепловоз Бреда қаласының маңындағы теміржол вокзалының жолымен жүріп өтті, сапар барысында ол әртүрлі кедергілерді танып, оларды еңсере білді. Автоматтандырылған локомотив бұған дейін бірнеше рет сынақтан өткізілген.
Локомотивке қабілеттілігі жоғары және көпбейінді камералары бар радар орнатылған, олардан алынған деректер кез келген ауа райында және кез келген көріну жағдайында локомотив бағытындағы кедергілерді анықтау және жіктеу үшін классикалық алгоритмдер мен машиналық оқыту технологияларын қолдану арқылы біріктіріледі. Бұл құрылғылар жолдағы кедергілерді 500 метр ұзақтықтан көре алады.
Alstom компаниясы магистральдық теміржол пойыздарын автоматтандыру бағытындағы көшбасшылардың бірі.
Айта кетсек, кеше Мемлекет Басшысы Қасым-Жомарт Тоқаевтың Францияға ресми сапары аясында «Қазақстан темір жолы» ҰК» АҚ мен «ALSTOM Transport SA» АҚ арасында келісімдерге қол қойылды.
Қабылданған құжатқа сәйкес ALSTOM компаниясы 2023-2029 жылдар кезеңінде қазақстандық зауытта ЭҚЗ электровоз шығарады және «Қазақстан темір жолы» ҰК» АҚ үшін 245 электровоз жеткізіп береді.