Өзбекстанда магистральдық электровоздарға жаңа қауіпсіздік жүйесі енгізілді

Өзбекстан темір жолдарында модернизацияланған «O’zbekiston» сериялы магистральдық жүк-жолаушы электровоздарына «БОРТ» атты борттық қауіпсіздік жүйесі орнатылды. Жобаны «Трансмашхолдинг» құрамындағы «Транстелесофт» компаниясы жүзеге асырған, деп хабарлайды Rail-news.kz.

Электровоздар бастапқыда 2000-жылдардың басында Қытайдың CRRC корпорациясы Siemens технологияларын пайдалана отырып жасаған техникалар болатын. Қазіргі модернизация аясында олардың екі алғашқы үлгісі Ташкент облысындағы «Өзбекстан» локомотив депосына жеткізілді.

Жаңа жүйе құрамына бейнебақылау камералары мен РЛСМ-10 радиостанциялары енгізілген. Бейнебақылау кабина ішіндегі, машиналық бөлімдегі және пойыз қозғалысы кезіндегі жағдайды тіркеуге мүмкіндік береді. Орнату және іске қосу жұмыстары CRRC және «O’zbekiston temir yo’llari» мамандарымен бірлесіп жүргізілді.

Жүйенің алғашқы сынақтары сәтті өтті. «БОРТ» қауіпсіздік кешені халықаралық SIL 4 деңгейіндегі талаптарға сай келеді және теміржол қауіпсіздігі бойынша ең жоғары стандарттардың бірі саналады. Қазіргі таңда бұл жүйе Қазақстан, Моңғолия, Өзбекстан және Қырғызстандағы 800-ден астам локомотивте қолданылады.

Бұған дейін Өзбекстанда «БОРТ» жүйесі тек маневрлік тепловоздарда қолданылып келген еді. Енді оның магистральдық электровоздарға енгізілуі ел теміржол жүйесін цифрландыру мен қауіпсіздікті арттыру бағытындағы маңызды қадам ретінде бағалануда.