Ақпанынан бастап 6 пойызда әйелдер вагондары пайда болмақ
«Қазақстан теміржолшысы» газетінің тілшісі
Үстіміздегі жылдың 1 ақпанынан бастап «Жолаушылар тасымалы» АҚ-на қарасты тағы алты бағдар бойынша жолаушылар пойызында әйелдер вагондары пайда болмақ.
Олар: №45/46 Павлодар-Шымкент; №85/86 Нұр-Сұлтан-1-Шымкент; №37/38 Маңғыстау-Нұр-Сұлтан-Нұрлы жол-Семей; №47/48 Нұр-Сұлтан-Нұрлы жол-Атырау; №379/380 Алматы-2-Орал және №73/74 Алматы-2-Жезқазған пойыздары.
Еске сала кетсек, Қазақстанда әйелдер вагондары 2021 жылдың қазан айында пайда болған еді. Алғаш рет олар №77/78 Алматы-Маңғыстау және №351/352 Алматы-1-Өскемен жолаушылар пойыздарында іске қосылған болатын. Жоба іске қосылған сәттен бастап, яғни 2021 жылғы 10 қазан мен 31 желтоқсан аралығында бұл қызметті 13 243 жолаушы әйел пайдаланған екен.
«Жолаушылар тасымалы» АҚ жүргізген маркетингтік зерттеулерге сүйенсек, жүргізілген сауалнама барысында нәзік жандардың көпшілігі пойызда әйелдер үшін жеке вагон болғанын қалайтындарын білдіріпті. Тіпті, кейбіреулері мұндай қызмет үшін артық ақша төлеуге де дайын екендіктерін жеткізген. Демек, әйелдер вагондарына сұраныс бар деген сөз.
Алты бағдар бойынша жолаушылар пойыздарында әйелдер вагонының пайда болуы – осының айқын дәлелі. Бірақ, бұл қызмет үшін әйел жолаушылардан қосымша қаражат алынбайды. Айта кетерлігі, 7 жасқа дейінгі еркек жынысты балаларды ресімдеуге де болады. Яғни, анасы, әпкесі немесе басқа да сенімді өкілі ерткен ұл балалар. «Жолаушылар тасымалы» АҚ мамандары BILET.RAILWAYS.KZ сайтында және билет кассаларында әйелдер вагондарына темір жол билеттерін ресімдеген кезде жолаушылар, әсіресе, ер адамдар шартты белгілерге назар аударып, мұқият болу керектігін ескертеді. Яғни, «ӘВ» – әйелдер вагоны екенін білдіретін шартты белгі. Ал сапар барысында сұрақтар туындаған жағдайда жолаушылар вагон жолсерігіне немесе пойыз бастығына жүгіне алады.
Сондай-ақ, әйелдер вагонына тек әйел жолсеріктер қызмет етеді. Елімізде әйелдер вагонының пайда болғанына байланысты, әрине екі жақты пікірдің қалыптасары анық. Біреулер, мұны адамдарды жынысына қарай ара-жікке бөлушілік немесе кемсітушілік деп қабылдайды. Қалай десек те, қазақ – әйел затын сыйлай, құрметтей білген халық. Сондықтан әйелдердің бұл қызметке деген сұранысын да түсіністікпен қабылдаған жөн. Жалпы, әйелдер вагондары Иран, Араб әмірліктері бірлестігі сияқты мұсылман елдерімен қатар Жапония, Корея, Үндістан мемлекеттерінде де бар. Ресей мемлекеті де бір кездері бұл жобаны қолданысқа енгізген, бірақ көпшілік тарапынан қолдау таппаған сыңайлы...