Ақтөбелік электромеханик әріптестерімен бірге күніне 400-ден астам релені жөндейді
Ақтөбе облысы бойынша меншікті тілші
Мейрамгүл Ақтаева – Ақтөбе белгі беру және байланыс дистанциясының тәжірибелі электромеханигі. Ол магистральдық желідегі әрбір реленің мүлтіксіз жұмыс жасауына жауапты. Ал желідегі реле ақауын анықтап, оны асқан шеберлікпен жөндеу – инемен құдық қазғандай өте күрделі жұмыс.
Дистанцияда 30 жылдан аса уақыт еңбектеніп келе жатқан кейіпкеріміз өзін кейде ота жасайтын емші дәрігерге, енді бірде инемен кесте тіккен қолөнершіге ұқсатады. Көз майын тауысып, тоқ көздері талшықтарының мінсіз қызметін бақылап, ақау шыққан релелерді зауыттан шыққандай қайта жасап шығару арқылы теміржол бойындағы сигналдар қауіпсіздігін қамтамасыз етуге өз үлесін қосып отырғанын мақтаныш та етеді.
«Жұмыс таңертең келгенде құрал-сайманды түгендеуден басталады. Олардың залалсыздандырылғанына көз жеткізуге тиіспіз. Әр деталь электр тоғымен байланысты. Тоқ өлшегіштердің ақаусыз жұмыс жасап тұрғанын, әр реленің оған қосылып тұрғанына көз жеткіземіз. Техникалық процесс талабында әр реленің өз мөлшері жазылған. Сол тәртіп сақталу керек», – дейді бұрағыш, қысқыш, тоқ өлшегіш құрал-саймандарды кезек алмастырып, алдында шашылып жатқан релені жинап отырған кейіпкеріміз.
Дистанцияның кең де жарық шеберханасында қаз-қатар отырған он шақты қыз-келіншек жоспарға сәйкес айына 400-ден аса релені жөндеп дайындайды екен. Әр реленің өз уақыты бар. Жарамдылық мерзімі біткендерін осында әкеледі. Электромеханиктер оларды ашып, барлық бөлшектерін шашып қарайды, ақауын жөндеп, алмастырып, зауыттан қайта шыққандай етіп жасап шығарады. Яғни, оларға екінші өмір сыйлайды. Әр реленің ерекшелігіне орай мм өлшеммен қаралады. Ең үлкені – 16 келі. Оны ашып-жинап, көтеріп тазалап, компьютерге қою – нәзік әйел затына тіпті де оңай емес. Десе де, көп дистанцияда осы жұмысты атқаратындардың дені әйелдер екен.
«Біздің жұмыс үшін зейнетке 63 жаста шығу өте қиын. Қазірдің өзінде кейбіріміз көзіміз дұрыс көрмей, күш-қайратымыз да қайтып жатқаны жасырын емес. Ал жауапкершілік өте үлкен. Инедей қателік орны толмас апатқа әкелуі мүмкін. Бағдаршамда қызыл жанудың орнына жасыл жанып тұрса, не болатынын ойлап көріңіз. Сондықтан әйелдерге 58 зейнет жасын қайтару мәселесін Үкімет қайта қараса дегенге біз де қосыламыз», – дейді Мейрамгүл Ақтаева.