Құрметті теміржолшы Жансерік Сағдиев 80 жаста

ҚТЖ келбеті
16.06.2023, 11:07
Суретті түсірген автор
Сұлугүл Бакесова

«Қазақстан теміржолшысы» газетінің тілшісі

Оның табаны күректей қырық төрт жыл ғұмыры теміржолда өтті. Теміржол оның бойына жауапкершілікті сезінетін, қатаң тәртіпті ұстанатын мінез қалыптастырды. Өмірге үлкен жауапкершілікпен қарайтын теміржолшының «Менің жолым» атты өмірбаяндық естелік кітабын оқып шығып, әр адам өз тағдырының иесі деген сөздің шынайылығына тағы көз жеткіздік.

Біздің кейіпкеріміз – ертең 17 маусым күні 80 жылдық мерейтойын атап өткелі отырған Құрметті теміржолшы Жансерік Сағдиев. 1943 жылы Ақмола қаласындағы Северный вагон деген көшеде орналасқан шағын ғана балшықтан соғылған үйде жарық дүниеге келген кейіпкеріміз көп балалы отбасыда туып-өскен екен. Өзінің жүріп өткен өмірі мен еңбек жолын баяндаған кітабында ағамыздың анасы Орынжанға жақын болғанын және оның тұлға болып қалыптасуында анасының ықпалы зор болғанын байқауға болады.  

«Қарапайым қазақ әйелінің рухының жасандылықтан ада мықтылығына, тектілігіне, адалдығына, тапқырлығына, алысты болжай білетін көкірегі ояу көрегендігіне, темірдей төзімділігі мен еңбекқорлығына тәнті болып, перзенті ретінде басымды иетінмін. Отан секілді Ана да адамда жалғыз!» – деп анасы туралы жүрекжарды лебізін білдіреді мерейтой иесі «Менің жолым» кітабында.  

Жансерік деген есімін ақтап расында да ата-анасының жанына серік болған ағамыз мектепте оқып жүріп еңбекке араласыпты. Теміржолшы мамандығын таңдауына осы жасөспірім шақта істеген жұмысы себепші болыпты.  

«9-сыныптан кейін жазғы каникул кезінде мен, 16 жастағы жасөспірім жол дистанциясына жұмысшы ретінде қабылдандым. Бұл шамамен 10 адамнан тұратын шағын көпір бригадасы еді. Біз көпірлер мен құбырлардың төсеніштерін тазарту, көпір аралықтарының жекелеген учаскелерін сылау, арматура дайындау, бетон құю, тағысын тағы жұмыстарды орындадық. Алғашқы жалақыма анама әдемі шарф сатып әпердім, қалғанын қолына ұстаттым. Сол сәттегі анамның қуанышын көрсеңіз!» – деп теміржолдағы алғашқы еңбек жолынан сыр шертеді кейіпкеріміз.  

Мектепте үздіктер тақтасынан түспей, оқуда алда болған Жансерік 10-сыныпты бітірген соң сол көпір бригадасына жұмысқа оралады. Көп ұзамай дистанцияның кадрлар бөліміне жастарды теміржол институтына оқуға жіберу үшін екі жолдама келіп, біреуі бұйырыпты.  

«Менің тәжірибемнің аздығына қарамай, екі адамның бірі болып мені Алматыға Новосибирск, Свердловск, Ленинград және Ташкент теміржол институттарына емтихан тапсыру үшін жіберді. Емтиханды ойдағыдай тапсырып, 25 ұпайдан 24 жинадым. Сөйтіп Ташкент институтының «Теміржолдар құрылысы мен жол шаруашылығы» факультетіне жолдама алдым», – деп еске алады студенттік өмірге қадам басқан шағын Жансерік ағамыз.  

Ол дипломды маман ретіндегі еңбек жолын жол бригадирінен бастап, Тың темір жолында жол бөлімшесінің бастығы, «ҚТЖ» ЖАҚ құрылғанда Бас басқарманың өндірістік бөлім бастығы, Жол қозғалысы қауіпсіздігі департаментінің ревизоры, аудитор, жедел-талдау бөлімінің бастығы сияқты қызметтік сатылардан өтіп, темір жол саласына саналы ғұмырының 44 жылын арнады. Теміржолдағы табысты да үздіксіз еңбегі, өндірістік көрсеткіштерде қол жеткізген жетістіктері үшін 2000 жылы Жансерік Сағдиев теміржол көлігіндегі ең жоғары награда «Құрметті теміржолшы» белгісімен марапатталады.

Мерейтой иесі Жансерік ағамыз құдай қосқан жары Кәмәлмен Мират, Асхат есімді екі ұлды дүниеге әкеліп, өсіріп жеткізді. Мират теміржол саласында еңбек етсе, Асхат экономика ғылымдарының кандидаты, Ресейде танымал бизнесмен.  

«Мен өмірімді босқа өткізген жоқпын. Әр адам – өз бақытының жасаушысы. Ұрпағыма бақытты болудың үлгісімін деген ойдамын», – деп сөзін түйіндейді сексеннің сеңгіріне шыққан ардагер-теміржолшы.  

 

Жолаушылар тасымалы
27.10.2025
Алматы мен Мәскеу арасында тікелей теміржол қатынасы ашылды
Жаңалықтар
25.10.2025
Талғат Алдыбергенов теміржолшыларды Республика күнімен құттықтады
Жаңалықтар
24.10.2025
ҚТЖ Республика күнін салтанатты түрде атап өтті
Инфрақұрылым
24.10.2025
Қызылжар жобасынан не күтеміз?
Инфрақұрылым
24.10.2025
Жол техникалары сапқа қойылды
Аймақтар
24.10.2025
Шаруашылықтар қысқа дайын ба?
Аймақтар
24.10.2025
Кемшіліктер қайталанбауы тиіс
ҚТЖ келбеті
24.10.2025
Жолаушының алғысына бөленген кассир
Аймақтар
24.10.2025
Вагон қараушыдан ұстазға айналған теміржолшы
Қауіпсіздік
24.10.2025
Өткел қауіпсіздігі – сенімді қолда
Әлеумет
24.10.2025
Үздік еңбек әулеті
Аймақтар
24.10.2025
«Таза Қазақстан» челленджі жалғасып жатыр
ҚТЖ келбеті
24.10.2025
Ақмаралдың алғашқы жеңісі
Аймақтар
24.10.2025
Вокзал маңы абаттандырылды
Жаңалықтар
24.10.2025
60-қа жуық студент ҚТЖ мұражайында болды
Жаңалықтар / Мұрағат
24.10.2025
Қазақстан теміржолшысы газеті, №88-89 24 қазан 2025 жыл
Жаңалықтар
23.10.2025
Көлік министрі Тбилисиде өткен V «Silk Road Forum» аясында сөз сөйледі
Инфрақұрылым
23.10.2025
Ақмая–Шиелі телімінде қызу жұмыс жүріп жатыр
Станция тынысы
23.10.2025
Рельс үстіндегі өмір: Манкент станциясының қаһармандары
ҚТЖ келбеті
23.10.2025
«Жыл машинисі» анықталды