Алдын алу шаралары нәтиже беруде
«Қазақстан теміржолшысы» газетінің тілшісі
Өткен жылы машинистер жолға шыққан мал мен жанды басып кетудің алдын алу үшін 4 700-ден астам шұғыл тежегіш қолданған.
Локомотив бригадаларының сауатты әрекеттерінің арқасында 3 406 жағдайда пойыздың адам не мал басып кетуінің алдын алу мүмкін болды. Қауіп-қатердің алдын алу шараларының арқасында темір жолда жарақат алған адамдар саны да азайды.
Өткен 2024 жылы Үйлестіру кеңесінің 298 отырысы ұйымдастырылып, оған прокуратура, полиция, көліктік бақылау органдары мен бұқаралық ақпарат құралдары өкілдері қатысты. 166 мыңнан астам адамды қамтыған тұрғындармен жұмыс аясында 12 мыңнан астам жиналыс өткізілді.
«Темір жол – тек көлік жүйесі ғана емес, сонымен қатар қауіптілігі жоғары аймақ. Осыны біле тұрып көп адамның сақтық шараларын елемейтіні өте өкінішті. Бұл адамның өз өмірін, денсаулығын қатерге тігуі болып табылады. Теміржолшылар барлық аймақта профилактикалық шараларды үздіксіз жүргізіп, адамдарға жолдан өту ережелерін түсіндіріп, түрлі кездесулер, рейдтер өткізіп келеді», – дейді «ҚТЖ» ҰК» АҚ Қозғалыс қауіпсіздігі департаментінің өкілі Мұрат Мусин.
Маманның айтуынша, өткен жылы өндірістік емес жарақаттанудың 75 жағдайы тіркелген. Оқиғалардың ең көбі Шымкент, Ақтөбе, Жамбыл және Ақмола жол бөлімшелерінде тіркелген.