Аягөздегі теміржолшылар мұражайы қайта жаңғырды
Шығыс Қазақстан облысы бойынша меншікті тілші, Семей
Аягөз локомотив пайдалану депосында аса құнды жәдігерлерге бай мұражай орналасқан. Жергілікті теміржолшылар үшін қастерлі саналатын осынау мәдени орын ҚТЖ-ның 25 жылдығы мен «Машинистер ұстаханасы» атанған депоның 90 жылдығына орай қайта жаңғыртудан өтті.
Локомотившілер мекемесінің мерейтойына орай арнайы іс-шаралар жоспары әзірленіп, шығындар сметасы да даярланғанымен, карантиндік шектеулерге байланысты өтпей қалған еді. Әйтсе де, оның аясында теміржолшылар мұражайы қайта жаңарды. Ондағы жәдігерлер тағы да біршама толықты. Әсіресе, бұрын-соңды мәлім болмаған құнды деректер қатарында, атап айтсақ, аягөздік Түрксіб ардагерлерінің, әр жылдарда еңбек еткен «Құрметті теміржолшы» атанған машинистер туралы құнды деректер жинақталды. Сондай-ақ, әйгілі династиялар, мемлекеттік марапат иелері жайлы және де салалық қызмет пен спорттағы жетістіктер туралы материалдар мен жәдігерлер музейге қойылды.
Көлемі 200 шаршы метрден асатын, үш залдан тұратын мәдени орын осылайша жаңа қырынан көрініс табуда. Түрксібтің даңқты құрылысшыларының фотосуреттері мен сол дәуірдегі қолданылған теміржол аспаптары өткеннен сыр шертеді. Сонымен қатар, Ақтоғай-Аягөз-Жарма телімдері аралығындағы теміржол схемасы, депоның келісті макеті де арнайы мүйіске қойылған.
Бір бұл емес, аймақ теміржолынан мол мағлұмат беретін байырғы мерзімдік басылымдар мен кітаптар, тарихи фотосуреттер де мұражай төрінен орын алған.
Аягөз бен Жарма – әйгілі теміржол династияларымен даңқы шыққан өңірлер. Шығыстағы шойынжолды түлеткен атақты әулеттердің деректері мен фотосуреттері де мұражайдан лайықты орын алған.Сонымен қатар, бір бұрыш тәуелсіздіктен кейінгі отандық теміржол тарихына арналған, ҚТЖ құрылған кезеңнен бергі уақытты қамтиды.
Қазіргі күні мұнда музейдің кәсіподақ ұйымы теңгеріміне алынуы себепті мүліктерді түгендеу жұмыстары жүргізіліп жатыр. Инвентаризациялау жұмыстары музей тарихында болмаған екен. Бұл орайда, аса құнды тарихи зат ретінде бағаланған 90 жәдігер нақтыланыпты. Олардың көпшілігі кешегі дәуірде аягөздік Түрксіб құрылысшыларының өз қолдарынан алынған. Көпшілігін олардың ұрпақтары әкеліп өткізген.
Сонымен қатар, тағы бір жаңалық – штат бөлініп, мұражай қызметіне арнайы адам алыныпты. Бұл да салалық кәсіподақ бастамасымен мәдени орынның қайта жандануын айғақтаса керек.