Абай облысын өркендетуде теміржолдың маңызы зор болмақ

Жаңадан құрылған Абай облысындағы өңдеу және өндіріс секторын қалпына келтіруде теміржол саласының ықпалы артатын болады. Аймақ логистикасында жылжымалы құрамдарды пайдаланудың үлесі ендігі жерде айтарлықтай жоғарыламақ.

Бұл туралы ҚР Парламенті депутаттары мен бірқатар министрлік өкілдерінің жаңа облыс орталығы Семей қаласына жасаған арнайы сапары барысында кеңінен талқыланды. Атап айтсақ, өңірді дамытуда жетекші орын алатын аграрлық секторға серпін беруде жүк тасымалын теміржол арқылы жүзеге асыру қазірдің өзінде кеңінен жолға қойылуда. Мәселен, үкімет мүшелері мен мәжіліс депутаттары майлы дақылдарды өңдеумен, тазартылған май өндірумен және шетелге экспорттаумен айналысатын «Qazaq Astyq Group» ЖШС-н аралау барысында теміржол тұйығы арқылы жүк жөнелтудің заманауи оңтайлы тәсілдерімен танысты.  

– Біздің зауыт бүгінде тазартылмаған өсімдік майын шығарады. Дайын өнім өзімізде құю және тазарту сызығы болмағандықтан бірден теміржол арқылы жөнелтіледі. Алдағы уақытта жоспарлар аясында қолға алынуы тиіс жаңа жобалар бар, – дейді кәсіпорын басшылығы. 

Зауыт өнімінің экспорттан артылған 20 пайызы республика көлеміне теміржол тасымалы арқылы таратылатын болады. Бұл шаралар алдағы күзден бастап орын алмақ. 

Қазіргі таңда жылжымалы құрам игілігін пайдаланудың тиімділіктері жан-жақты сарапталып жатыр. Қазіргі таңда қуаттылығы аса жоғары кәсіпорын аумағынан шығатын теміржол желісін Семей жол дистанциясының жұмысшылары жол машиналары арқылы ағымдық жөндеуден өткізіп, шпалдарын ауыстырып шықты. Ондағы қозғалыс Семей станциясының қадағалауында. 

Абай облысының басшылығы Президент Қасым-Жомарт Кемелұлы Тоқаев мәлімдеген Қазақстанды ауқымды жаңғырту тұжырымдамасына тікелей сәйкес келетін, жаңа инновациялық технологияларға инвестиция салуды қолдайды. Семей қаласы Шығыс пен Батыс арасындағы ең ірі транзиттік хаб, осыдан 100 жыл бұрын өлке арқылы Транссібір магистралі өткені кездейсоқ емес, сондықтан жергілікті атқарушы билік теміржол тасымалының мүмкіндіктерін барынша пайдалануды көздейді. 

Сол тәрізді теміржол тұйықтары, жалпы жылжымалы құрамдарды пайдалану арқылы аймақтың индустриялық әлеуетін дамыту, тіпті, азық-түлік пен өзге де тауарлардың баға тұрақтылығына ықпал ету мәселелері Шығыс Қазақстан облысы бойынша кеңінен қарастырылуда. Мәселен, облыс басшылығының шешімімен Тараз және Көксу қант зауыттарынан 430-450 теңге/кг бағамен 28 вагон болатын құмшекер сатып алу үшін 839 млн. теңге мөлшерінде қаражат бөлінді. Жеткізу апта сайын жүк пойыздары арқылы жүзеге асырылады. Осылайша өнімдер тұрақтандыру қорының сауда павильондарына жөнелтілмек. Жалпы, жүк пойыздарына тапсырыс беру автокөлікке қарағанда анағұрлым арзанға түседі. Облыстағы инфляцияға қарсы әрекет бойынша шараларды іске асыру шеңберінде бұл мәселе бірінші кезекте қарастырылған. 

Аймақ логистикасы бойынша автокөліктен теміржол желісіне ауысып жатқан орта кәсіпкерлік субъектілері көп. Мәселен, Өскемен қаласындағы «Өркен-КШТ» индустриялық аймағын дамыту бойынша көптеген жаңа жобалар ішінде теміржол тұйықтарын салу ісі көзделінген. Мұндай шаралар қатары, Семей мен Аягөз станциялары бойынша да жыл сайын артып келеді.