Арыста ауқымды жұмыс атқарылды

Оңтүстікте теміржолшылар қаласы атанған Арыс станциясын дамыту жобасын іске асырудың бірінші кезеңі аяқталды. Мұның өзі станцияның өткізу қабілетін тәулігіне 41-ден 57 жұп пойызға дейін, яғни 20% арттыруға мүмкіндік беріп отыр.    

Одақ тараған соң, 1992 жылдан бері Арыс станциясының Е, Д сұрыптау дөңестерінің жұмыстары тоқтатылып, қаңтарылып бос тұрған болатын. 2009, 2013, 2018 жылдары оларды қалпына келтіру әрекеттері болғанымен ол сәтсіз аяқталды.  

ҚТЖ басшылығының тапсырмасы бойынша өткен жылдың желтоқсан айында станцияны ауқымды жаңғырту жұмыстары басталды. Дирекция мамандарының айтуынша, Түркістан тарапынан Д паркінің бағытындағы 860 метр байланыстырушы жолды бөлшектеуге тура келген. Өйткені Е, Д парктерінің жолдары мазуттан қатпарланып, ластанып кеткен екен. Шпалдардың да жағдайы мәз емес. Жолды УК РШП кранымен бөлшектеуге кірісіпті, бірақ толық бөлшектеу мүмкін болмағандықтан рельстерді қолмен алуға шешім қабылданған. Бұл жұмысқа төрт ай бойы күн сайын 40-50 адам жұмылдырылған.  

Жұмыстың дені жазғы жол жұмыстары басталғанға дейін, жылы келетін оңтүстіктің қысқы айларында жүргізілгендіктен, пайдалану шығындарын да азайтуға мүмкіндік болған. Сол уақытта Шымкент бөлімшесінде күрделі жөндеу кезінде шығарылған рельс-шпал торкөздерін іріктеп, төсеу жұмыстары қатар жүргізіліпті. Жол жұмысына адамдардан бөлек ПРБ жол техникасы, электробалластер, «Дуомат», «Унимат» машиналар кешені, ал шпалды ауыстыруға «Жейсмар» техникасы пайдаланылған. Бұл жұмыс Сарыағаш станциясы бойынша жүретін айналма жолдың құрылысымен бір мезгілде қатар орындалған.  

Сонымен төрт ай ішінде арнайы жол техникасының көмегімен жалпы ұзындығы 13,5 км 12 жол жөнделіп, 10 мың текше метр қиыршық тас балласты төселген.  Ескі 16 бағыттағыш бұрманың су жаңа сапалы түріне алмастырылған. Міне, осылайша Магистральдық желі дирекциясының күшімен станцияның жаңағы сұрыптау дөңестерінің екі паркі қайта жаңартылып, іске қосылған. Сонымен қатар жобаны іске асыру шеңберінде 54,5 км кабель төселіп, белгі беру, орталықтандыру және бұғаттау аппаратурасы (жалпы көлемі 433 атау), 6 вагон баяулатқышы, компрессорлық станцияны электрмен жабдықтау үшін трансформатор орнатылған.  

Арыс, Қызылорда, Шымкент, Жамбыл жол шаруашылығы, белгі беру  және байланыс дистанцияларының 180-нен астам қызметкерінің күш-жігері нәтижесінде жұмыстар қысқа мерзімде аяқталып, биылғы 30 сәуірде қалпына келтірілген жұп дөңес арқылы Түркістан станциясынан келген алғашқы пойыз таратылған.  

Мамандар дөңесті қайта құрылымдау станцияның өңдеу қабілетін тәулігіне 3306-дан 5250 вагонға дейін (55%) арттыратынын, сондай-ақ Сарыағаш ШАТП бойынша шекаралық бақылауды жеделдету үшін біртекті пойыздарды қалыптастыруға мүмкіндік беретінін айтып отыр.