Тоқсанды табысты қортындылады

Әлемді үрейлендірген қауіпті вирустың ушығып кетуіне және елдегі төтенше жағдайға қарамастан Атырау жүк тасымалы бөлімшесі үшін биылғы жылдың алғашқы тоқсаны табыссыз болған жоқ, жоспар тиімді орындалып отыр.

Өткен үш айда техникалық жоспарға сай негізгі 13 көрсеткіш 100 пайыздан аса орындалған. Яғни, пайдаланым жүк айналымы 2426,5 млн.т-км.нетто болып, 105,1 %-ды құрады. Жүк тиеу көлемі 2739,5 мың тонна болып, орындалуы -101,5 пайызды көрсетті. Пайдаланым жүк айналымымен қоса, жұмыс вагонының айналымы 101,5, жергілікті вагон айналымы 101,2, ал жүк вагонының өнімділігі 100,4%, тиелген вагонның динамикалық салмағы 101,4, вагонның орташа тәуліктік жүрісі 99,9,%, вагонның статистикалық салмағы 101,8%, жүк пойызының орташа салмағы 4019 тоннабрутто, яғни 101,4 % көрсетіп, аймақта жүк тасымалы көлемінің үш айда тәп-тәуір артқанын байқатты.

Локомотив жүрісі 100,1%, пойыздың учаскелік жылдамдығы 100,2%, пойыздар қозғалысының техникалық жылдамдығы 100,4%, вагонның бір жүк операциясына тұруы 101% болып орындалды. Аталған он үш көрсеткішке қарап, өңірде тасымал тасқыны ойдағыдай екенін байқауға болады.

Ал енді Директорлар кеңесі жоспары бойынша қарасақ, пайдаланым жүк айналымы 2426,5 млн.т-кмнетто болып, 99,9 %-ды құрады. Жүк тиеу көлемі 7793,5 мың тонна болып, орындалуы 106,8 пайыз болды, жүк вагондарының айналымы 100%, пойыздың орташа салмағы 102,1%, сол секілді негізгі басқа көрсеткіштер де жоғары деуге негіз бар. СД бойынша 11 пайдаланым көрсеткіші орындалған. Межеге жетпей қалғаны – төрт көрсеткіш.

Атырау жүк тасымалы бөлімшесінің техникалық бөлім бастығы Темірхан Аманқұловтың айтуынша, жылдың бастапқы екі айында пайдаланым жүк айналымы жүз пайызға орындалған, тек наурыз айында жүк вагондарының азаюынан (тәулігіне 60 вагон) жүк вагондарының жүрісі кеміген. Жүк вагондарының айналымы бөлімшенің ішкі және сыртқы торабында бос вагондардың көбеюінен болған.

СД бойынша вагондардың орташа тәуліктік жүрісінің азаюы жүк және бос вагондардың қысқаруынан, сонымен қатар Құлсары, Қиғаш тораптары бойынша бос жартылай вагондардың, цистерналардың, астықтиегіштер мен жергілікті вагондардың көбеюінен орын алған. Пойыздар қозғалысының орташа учаскелік және техникалық жылдамдығының кемуіне кейбір учаскелерде жылдамдықты шектеуге ескерту берілгендігінен болған. Оған шпалдың ақаулығы, Сағыз түйіспесі бойынша пойыздардың көбейіп кетуі (тәулігіне 13 пойыз орнына 14 пойыздан, ал кей күндері 19 пойыздан келген) себеп болып, аралық станцияларда пойыздардың тұрып қалуына алып келді. Жылдамдықтың кемуіне ауа-райының қолайсыздығы да әсер етіп, облыста желдің күшеюі секундына 15-22 метрге жетті.

Мақат, Атырау, Құлсары, Махамбет, Сағыз, Ақжайық, Қарабатан станцияларында жүк операциясына келген вагондардың тұрып қалуы, жиналуын күту, локомотивтерді жалғау жұмыстары да учаскелік жалдымдықтың төмендеуіне әсер еткен. Алайда, жалпы алғанда өңірде жүк айналымының қарқыны алғашқы тоқсанда көңіл тоғайтарлық болған.