Мал басу оқиғасы өршіп тұр...
![](https://rail-news.kz/uploads/posts/wp-content/uploads/2021/06/de-12ііx9іі.jpg)
![](https://rail-news.kz/img/noimg.png)
Атырау облысы бойынша меншікті тілші
Қазіргі жаз мезгілінде далада қараусыз мал өріп жүр. Биылғы жылдың бес айында өңірде жүк және жолаушы пойыздарының мал басу оқиғасы 30-ға жеткен. Әсіресе, сиыр, түйе, жылқы малдары жол бойында жортып жүріп ажал құшуда... Амал не, теміржолдың қауіпті аймақ екенін біле тұра пойыз астынан өтетіндер, малды жол бойына жаятындар азаяр емес. Атырау жүк тасымалы бөлімшесі қауіпсіздік инженері Ф.Қазжанованың айтуынша, биылғы жылы қозғалыс қауіпсіздігін бұзу, адам басу, жол-көлік оқиғалары тіркелмеген. «Жолда – адам» ережесіне сәйкес теміржолдан рұқсат етілмеген жерден өту бойынша алдын алу жұмыстары үнемі жүргізіліп келеді. Аталған тақырыпта елді мекендер мен мектептерде жиналыстар өткізіліп, жергілікті бұқаралық ақпарат құралдарында мақалалар жарияланған. Соған қарамастан жаяу жүргіншілер өткелі бола тұра, адамдар рұқсат етілмеген жерден және пойыз астынан өтуді тоқтатпай отыр. Әсіресе қауіпті саналатын жерлер Атырау-Махамбет, Махамбет-Қызылжар, Бақсай-Аққыстау, Құлсары-Шоқпартоғай, Жантерек-Мұқыр-Сағыз, Ганюшкино-Атырау аралықтары екен. Аудан әкмдеріне малды теміржол бойына жаймау бақташы қою, мал иелеріне ескерту жұмыстарын жүргізу жөнінде талай хаттар да жазылып жатыр, бірақ нәтиже көңіл көншітерліктей емес. Мал бағу ережелері туралы мыңдаған адамға үзінді көшірме берілсе де, өткен бес айда төрт түліктің кесірінен жүріп келе жатқан пойызды 134 шұғыл тоқтату орын алған. Былтыр осы мерзімде 150 шұғыл тежеу орын алып, мал басудың 11 оқиғасы тір келген болатын. Сегіз малдың иесі табылып, оларға әкімшілік жаза қолданылса, қалған үшеуінің иесі ақыры таптырмай кеткен. Ондай жағдайда шұғыл тежеудің шығынын «ҚТЖ» АҚ өтеуге тиіс. Сондықтан бұл жерде мал иелері мен жергілікті әкімдікті шығынды төлеуге міндеттеуді заң жүзінде бекітудің қажеттігі туындайды. Атырау магистарльдық желі бөлімшесінде жыл сайын жол дистанцияларының өз күшімен теміржол бойын малдан оқшаулау, қоршау, яғни тосқауыл-шарбақ салу жұмыстары жүргізіліп келеді. 2015 жылдан бастап Атырау магистральдық желі бөлімшесіне қарасты жол дистанциялары бойынша жолдарға мал өтпейтін шарбақ салу жұмыстары кезең-кезеңмен жүргізіліп келеді. Бүгінде 224 шақырымда қоршау бар, ол барлық ұзындықтың тек 27 пайызы ғана. Былтыр бөлімше қаражатына мал иелеріне 1000 дана жарықшағылдырғыш таратылған. Оның көмегі сол, түнгі уақыттарда мал мойнына байланған жарықшағылдырғыш машинистерге жарық беріп, алыстан көрініп тұрады. Мал басудан қорғайтын осындай шаралар орындалып жатыр, әйтсе де, мал иелері жауапкершілікті сезінуі тиіс дейді теміржолшылар.