Бастауыш кәсіподақ ұйымдары жылына орай «Қазкөліккәсіп» қоғамдық бірлестігіне қарасты «Астана» филиалы арнайы семинар өткізді. «Бастауыш кәсіподақ ұйымы – кәсіподақ қозғалысының тірегі» атты семинарға елорда теміржолындағы барлық бастауыш кәсіподақ ұйымдарының өкілдері қатысып, саладағы маңызды жаңалықтарымен бөлісті, деп хабарлайды Rail-news.kz. «Астана» торабы кәсіподақ филиалының төрағасы Серік Сәрсекеев семинарды ашып, кезекті баяндамашыларға берді. Жаз бойы өңірлерді аралап, аймақтағы теміржолшылар жағдайымен танысқан «Қазкөліккәсіп» ҚБ төрағасының орынбасары Жұпарбек Сәбитов төрт рет өткізілген комиссия қорытындысын баяндады.
– Өңірлерде өткен жиындар кезінде салалық жәрдемақы беру мәселесі көтерілді. Сол кезде біз локомотившілер сияқты салалық жәрдемақыны жолшылар мен пойыз құрастырушыларға да тағайындау туралы ұсыныс көтердік. 2013 жылғы Үкіметтің қаулысымен теміржолда зиянды қызметке жататын 23 мамандық бекітілгені белгілі. Солардың ішінде осы сала жұмысшылары бар. Енді жаңа жәрдемақы көмегімен осы кәсіп иелерін де зейнеткерлікке ертерек шығару туралы идея басында қолдау тапқанымен, компания үшін миллиардтаған теңге сома шығын келетіндіктен әзірге бұл бастама кейінге қалдырылды. Дегенмен біз мұны мемлекет деңгейінде көтеріп, қазіргі таңда депутаттар аталған мамандық иелерін мерзімінен бұрын зейнетке шығару мәселесін қарастыру үстінде, бәлкім алдағы уақытта оң шешімін тауып қалар, – деді ол «Қалың қалай, бастауыш кәсіподақ?» атты баяндамасымен таныстыру барысында.
Жас және тәжірибелі теміржолшылардың жалақы көлемінің бірдей болуы әділетсіздік, еңбекақы еңбек өтіліне қарай төленуі керек деген бастауыш ұйымның бастамасына құптау білдірген Жұпарбек Сәбитов кәсіподақ әр жұмысшының он жыл сайын жалақысын екі есе көбейтіп отыру мәселесін көтеріп отырғанын жеткізді. Алайда ұлттық компанияның қазіргі таңдағы қаржылық қиындықтарына байланысты бұл бастамалар кейінге ысырылып қалды. Дегенмен кәсіподақ қолға алған бастамаларын аяқсыз қалдырмай, алдағы уақытта да көтеріп, шешімін табуға тырысатын болады. Семинар- да компания тарихында бірінші рет биыл жалақы бір жылда екі рет көтерілгені де айтылды.
– Жалақы теміржолшыға қайдан түседі? Мейлі он жерден керемет жол салынып, инфрақұрылымды дамыт. Алайда сол жолмен пойыз жүрмесе, ақша да жоқ. Қаржының көлемі тасымалдың, оның ішінде басты табыс көзі транзиттік тасымалдың көлемі мен шамасына қарай белгілі болады. Қазіргі таңда Қазақстан теміржолы еңбек өнімділігі жағынан ресейлік көршілерден 2,5 есе артта қалып келеді. Бұл дегеніміз, көршілерде бір адам атқаратын жұмысты бізде 2,5 адам істейді деген сөз. Демек, қаржы да сонша адамға бөлінеді. Қазір ұлттық компанияда кәсіподақпен бірлесе оңтайландыру жұмыстары қарқынды жүріп жатыр. Біз әрбір адамның тағдырына мұқият қарап, қысқарған жағдайда басқа жұмыс ұсыну немесе өтемақы төлеу мәселесін назарда ұстаймыз. Бұрын компанияда 150 мың адам еңбек етсе, қазіргі таңда 110 мың адам қалды. Компания алдағы жылдың басынан жалақыны 5 пайыз көтеруді қарастырып отыр, бірақ біз кем дегенде 10 пайыз көтеру керектігін талап етудеміз, – деп атап өтті тағы да кәсіподақ өкілі.
Семинарда Қазақстанның еңбек заңына, қауіпсіздік пен еңбек қорғау, әлеуметтік-тұрмыстық мәселелерге қатысты сауалдар көтерілді. Биыл 10 айда теміржолшылардан осы тақырыптарда 100 өтінім келіп түскен. Солардың ішінен іріктеліп дайындалған ең маңызды деген 33 сұрақтың жауабын «Қазкөліккәсіп» ҚБ бас техникалық инспекторы Қайрат Мұқанов баяндап берді. Ал Іс-шара бағдарламасына сай «Татуласу орталығы» жұмысы туралы аталған орталық басшысы Әсел Басырова мәлімдеді. Бірлестіктің бас құқықтық инспекторы Назира Серікқызы Ұжымдық шартқа енгізілген өзгерістер мен толықтыруларға тоқталып өтті. «Кәсіподақтағы ұйымдастырушылық жұмыстары» жөнінде «Қазкөліккәсіп» ҚБ департамент директоры Нұрлан Нұрпейісов баяндап, кәсіподаққа мүшелікке тарту, кәсіподақ билеттерін ресімдеуден бастап кәсіподақ міндеттері мен құқықтарын түсіндіру, жұмысын жоспарлау, кәсіподақ активін оқытуды ұйымдастыру, арыз-шағымдар мен өтінімдерді талдау және тағы басқа да мәселелерге тоқталды. Семинар соңында қатысушыларға сертификаттар табыс етілді.