"Құрамында адамды бақылайтын чип бар". Вакцина туралы неше түрлі қауесет

Әлемді жайлаған COVID-19 коронавирустық инфекциясы адам денсаулығына қауіпті індет болып отыр. Медицина мамандарының айтуынша, онымен күрестің жалғыз жолы – ол вакцинация салдыру. Бұл процесс Атырау жүк тасымалы бөлімшесі теміржолшылары арасында да жүріп жатқанымен, әлі де баяулық, тартыншақтық бар. Соған сәйкес жуырда бөлімшеде «Медикер» ЖШС медициналық директоры Бақытжамал Иманалиева мен эпидемиолог дәрігер Марияш Жанабергенова келіп жұмысшылармен кездесті. Б.Иманалиеваның атап өткеніндей, екпе алудан қорқудың еш қажеті жоқ. Оның құрамында адамды бақылайтын чип болады екен, адам ағзасына жабысып қалатын магнит бармыс деген секілді неше түрлі қауесет шындыққа жанаспайды. Маманның айтуынша, вакцинаны әзірлеу үшін бір жылдай уақыт кеткен. Осы уақыт бойына әлемдік ғалымдар оны жан-жақты зерттеп, зерделеп, адам ағзасындағы вирусты жоюға күші жеткілікті дәрежеге жеткізген. – Елімізде вакцинациялау вакцинаның келіп түсуіне байланысты кезең-кезеңмен жүзеге асырылуда. Бұл ретте, бірінші кезекте, коронавирустық инфекцияны жұқтыру және тарату тәуекелі жоғары халықтың осал топтары коронавирустық инфекцияға қарсы вакцинациялауға жатады, одан әрі иммундауға жататын халықтың осал топтары қамтылуда. Бірінші кезеңде инфекциялық аурулар ауруханаларының, жедел медициналық көмек, реанимация, МСАК, қабылдау бөлмелерінің медицина қызметкерлері, санэпидқызмет қызметкерлері вакцинациямен қамтылды. Екінші кезеңде жалпы білім беретін мектептердің, жоғары оқу орындарының педагогтарын, бірінші кезеңге кірмеген медициналық қызметкерлер вакцинациялаумен, ал үшінші кезең мектеп-интернаттардың, мектепке дейінгі мекемелердің педагогтары, студенттер мен созылмалы аурулары бар адамдар қамтылады. Бұдан басқа, халықтың қосымша осал топтары: ТЖМ, ІІМ, Қорғаныс министрлігі, ҰҚК, Мемлекеттік күзет қызметінің қызметкерлерін және басқаларды қоса отырып, контингентті кеңейту қолға алынды, – дейді маман. Бұл жерде ең маңыздысы – ұжымдық иммунитет қалыптастыру. Халықтың 60-70 пайызы екпе алдырса, індетті жеңуге болады. Ал қалған 30-40 пайызы кімдер деген сұраққа маман «олар балалар мен егде және созылмалы ауруы бар, медициналық тұрғыдан екпе алуға болмайтын адамдар» деп жауап берді. Бөлімше басшысы Д.Құланбаев бұған дейінгі оба, шешек, тырысқақ ауруларын да кезінде үкімет екпе арқылы жеңгенін атап өтіп, бұл аурудың да емі вакцинация алу екенін баса айтты. Өзі де алғашқылардың бірі боп екпе алған. «Біз ұжымбыз, бір-бірімізбен тығыз қарым-қатынаста жүреміз, бір бөлмеде отырамыз. Біреуіміз ауырсақ айналадағы бірнеше адамға жұқтыруымыз мүмкін. Сондықтан өзіңді, отбасыңды, ұжымыңды ойлап, екпе алдыру керек» дейді ол. Әйтсе де, әлі де сенбеушілік танытып, екпе алғысы келмейтіндер де бар екен. Теңдік станциясының бастығы Б.Меңдешов: «Мен ковидпен қатты ауырып тұрғандардың бірімін. Осы вакцинация арқасында аман қалдым. Сондықтан салдырған дұрыс деп санаймын» деп ой қосты. Бөлімше басшысының орынбасары С.Қабдешев те өзінің және барлық отбасы мүшелерінің екпе алдырғанын алға тартып, одан қашпау керек деп кеңес берді. Эпидемилог дәрігер М.Жанабергенованың айтуынша, вакцинация алу ерікті түрде жүзеге асырылады. Бірақ ауру белгісі бар адам міндетті түрде дәрігерге қаралуы тиіс. – Вакцинация мен жай дәрі не екпе алуды шатастырмау керек. Вакцинация ол антитела немесе иммуноглобулин. Адам бойындағы кез келген инфекцияға қарсы тұрып, оны жояды және алға қарай оның қайта кіруіне қарсылық білдіреді. Бізде қазір ресейлік Спутник-V және арабтық Хаят-вак вакциналарын егу жүріп жатыр. Екеуі де әбден зерттеуден өткен, сарапталған вакциналар. Бұрын оба, шешек, кейін туберкулез, 90-шы жылдары гепатит ауруларын осы вакцинация арқылы жеңді. Сондықтан вакцина алу өзіңіз үшін қажет, – деді ол. Теміржолшылар тарапынан вакцинация қаншалықты қауіпсіз, одан аллергия болуы мүмкін бе, неге екі кезеңде алу керек, вакцина құрамы қандай, оның электронды паспорты дегеніміз не, т.б. көкейдегі көптеген сұрақтарын қойып, мамандар тарапынан толық жауап алды. Айта кетерлігі, бүгінгі күні бөлімше бойынша теміржолшылардың елу пайыздайы вакцина алған.