Астық тасымалдау жайы талқыланды

«ҚТЖ» ҰК» АҚ, Ауыл шаруашылығы министрлігі және «Атамекен» ҰКП бірлескен отырысында биылғы астықты тасымалдау мәселесі талқыланды. Жиынға Қазақстан астық өңдеушілер одағы өкілдері, астық трейдерлері, ірі экспорттау мен экспедиторлар қатысты.

Қазақстанда астық тасымалдаушы вагондар паркі 2014 жылдан бері бәсекелес ортаға берілген. Барлығы 10 мыңнан астам хоппер-астық тасымалдаушы бар, соның негізгі бөлігін «Астық Транс» АҚ басқарады. Жабық вагондар паркінде 17,5 мыңнан астам вагон бар. Соның ішінде азық-түлік жүктерін тасымалдауға жарамды 2 мың жабық вагон «Қазтеміртранс» АҚ меншігінде.  

Биыл қыркүйек айында Қазақстан ішінде астық тиеу өткен жылдың сәйкес кезеңімен салыстырғанда 13 пайызға, экспорт 14 пайызға өскен. Ұнтақталған өнімдерді тиеу республика бойынша 34 пайызға, экспортқа жіберу 87 пайызға артқан. Вагон паркіне сұраныс шарықтау шегіне жететін кезде Қазтеміртранс вагондарына да сұраныс біршама өскен, ал оларды пайдалану бағасы нарықтан 30-40 пайыз төмен.  

Отырысқа қатысушылар вагон паркін тиімді пайдалану, вагондардың орташа айналымы уақытының 60 пайызын құрайтын станцияларда бастапқы және соңғы операцияларды жүзеге асыру кезінде вагондар айналымының уақытын қысқарту, т.б. мәселелерді ортаға салды. Мәселен, тиеу үшін 6 тәулікке дейін, түсіруге 4 тәулікке дейін уақыт кетеді. Астық тиеу демалыс күндері, яғни элеваторлар қос тарифпен жұмыс істегенде немесе жұмыс істемей тұрғанда азаяды. Сондай-ақ элеваторлардың облыс және аудан орталықтарынан алыстығына байланысты кедендік және ілеспе рұқсат беру құжаттарын ресімдеу 4 тәулікке дейін созылып кетеді.  

Вагондардың нормативтік айналымын орындау және олардың тапшылығын болдырмау үшін ҚТЖ ірі жүк жөнелтушілермен бірлесе астық жүктерін бағдарлауды ұйымдастырды, бұл вагондардың жүру жолында қайта өңдеуді болдырмайды және тәулігіне 800 км-ге дейінгі бағдарлау жылдамдығын қамтамасыз етеді.  

Жиын барысында ҚТЖ астық пен ұн тасымалдау үшін бос вагондарды бөлу бойынша елдің жетекші астық өндіруші өңірлерінде жұмыс топтарын құруды ұсынды. Олардың құрамына Ауыл шаруашылығы министрлігінің, «Атамекен» ҰКП өкілдері, жекеменшік вагон операторлары мен жүк жөнелтушілер кіреді. Қатысушылар логистиканы ұйымдастыру бойынша басқа да мәселелерді талқылап, осылай жиындарды тұрақты өткізіп тұруға келісті.