Контейнерлік транзит үш есе артты
«Қазақстан теміржолшысы» газетінің тілшісі
«ҚТЖ» ҰК» АҚ алға тартқан деректерге сүйенсек, ағымдағы жылдың алғашқы тоқсанында транзиттік жүк тасымалы көлемі өткен жылдың сәйкес кезеңімен салыстырғанда 35% артып, 7,2 миллион тоннаны құраған. Соның ішінде, контейнерлік тасымал өсімі 19% құрап, 313 мың ЖФЭ-ге жеткен.
Соңғы бес жылда контейнерлік транзит көлемі үш есеге өсіп, 1 миллион жиырма футтық эквиваленттен (ЖФЭ) асқан. Негізгі өсімді Қытай – Еуропа – Қытай бағытындағы транзиттік тасымал құрап отыр.
«2022 жылы Қазақстан мен Қытай арасындағы жүк айналымы тарихи максимумға жетіп, 23 миллион тоннадан асты. Биыл да өсу үрдісі жалғасуда. Оның жарқын көрінісін, алғашқы үш айда екі ел арасындағы жүк айналымының 30 пайыздан асып орындалғанынан көруге болады. Егер Қазақстанның Қытайға экспортын бөлек алып қарайтын болсақ, бірінші тоқсанда өсім 53%-ды құрады. Біз жүк айналымын одан әрі қарай өсіру мүмкіндігін, әлеуетін көріп отырмыз және осы бағытта қарқынды жұмыс істейтін боламыз», – деп мәлімдеді бұл туралы жуырда Алматыда өткен бизнес-конференцияда «Қазақстан темір жолы» ҰК» АҚ Басқарма төрағасының орынбасары Ерлан Қойшыбаев.
Қазір теміржол көлігінде контейнерлендіру жүк тасымалын дамытудың перспективалық бағыты болып отыр. Мәселен, 2022 жылы контейнерлерде 15,7 млн тонна жүк тасымалданып, контейнерлеу деңгейі 5,5%-ға дейін өскен. Соның ішінде, былтырғы контейнерлердегі экспорттық жүктердің өсімі 2021 жылға қарағанда 30,3%-ды құраған. Осы ретте, контейнерлендірудің негізгі өсімі Қытай мен Түркияға бағытталған астық, сондай-ақ, ҚХР-ға тасымалданған мұнай коксы, астықтың тартылған өнімдері мен түсті рудалар еншісіне келіп отыр.
Қазіргі уақытта жүк тасымалының контейнерлік нарығындағы ірі ойыншылармен ынтымақтастық жалғасып, ауыл шаруашылығы өнімдерін тиеу үшін қолданыстағы терминалдарды қайта құрылымдау жұмыстары жүргізілуде.
Сонымен қатар қазақстандық жүктерді контейнермен тасымалдау деңгейін арттыру үшін бәсекелестік жағдайлар жасалуда. Бұдан бөлек, Қазақстан Республикасының көлік-логистикалық әлеуетін дамытудың 2030 жылға дейінгі тұжырымдамасы аясында Индустрия және инфрақұрылымдық даму министрлігіне тиісті мемлекеттік органдармен, «ҚТЖ» ҰК» АҚ және бизнеспен бірлесіп Қазақстан Республикасында жүктерді контейнерлеу және контейнерлік тасымалдау бағдарламасын әзірлеу тапсырылған.